کلکتہ، 02 جنوری (یو این آئی) مغربی بنگال کی وزیر اعلیٰ ممتا بنرجی کے قریبی ساتھی اور ترنمول کانگریس کے کونسلر دُلال عرف بابلا سرکار کو آج مالدہ ضلع میں چار مسلح حملہ آوروں نے گولی مار کر ہلاک کر دیا۔محترمہ بنرجی نے آج یہ جانکاری دی۔ انہوں نے کہا کہ ان کے قریبی ساتھی مسٹر بابلا سرکار کا مبینہ طور پر مالدہ ضلع میں قتل کیا گیا۔ انہوں نے اس واقعہ پر دکھ کا اظہار کیا۔ مسٹر سرکار کو آج صبح جھلجھلیا موڑ پر موٹر سائیکل پر سوار بندوق برداروں نے کئی گولیاں ماریں۔ پولیس نے بتایا کہ چار مسلح افراد نے آج صبح مسٹر سرکار کو قریب سے گولی مار دی جس کے نتیجے میں ان کی موت ہو گئی۔
پولیس نے بتایا کہ حملہ آور دو موٹر سائیکلوں پر آئے اور پیچھے سے چار گولیاں چلائیں۔ مسٹرسرکار کو تین گولیاں لگیں، جس سے ان کے کندھے اور سر پر چوٹیں آئیں، جس کے بعد انہیں اسپتال لے جایا گیا، جہاں ان کی موت ہوگئی۔محترمہ بنرجی نے کہا، "میرے قریبی ساتھی اور بہت مقبول لیڈر بابلا سرکار کو آج قتل کر دیا گیا۔ "ترنمول کانگریس کے آغاز کے بعد سے، انہوں نے (اور ان کی اہلیہ چیتالی سرکار) نے پارٹی کے لیے سخت محنت کی اور کونسلر کے طور پر بھی منتخب ہوئے۔” انہوں نے واقعے پر افسوس کا اظہار کرتے ہوئے سوگوار خاندان سے تعزیت کا اظہار بھی کیا۔محترمہ بنرجی نے کہا، "میں اس واقعہ کے بارے میں جان کر دکھی اور صدمے میں ہوں۔ ملزمان کے خلاف فوری طور پر مقدمہ درج کیا جائے۔
