پریاگ راج، 17 اگست (یو این آئی) سنگم نگر پریاگ راج میں گنگا اور یمنا ندیوں میں پانی کی سطح بڑھنے سے ساحلی علاقوں میں سیلاب کا خطرہ ستانے لگا ہے۔ گزشتہ 24 گھنٹوں کے دوران گنگا اور جمنا کے پانی کی سطح میں بالترتیب 29 اور 21 سینٹی میٹر کا اضافہ ہوا ہے۔
ایریگیشن فلڈ ڈویژن کے کنٹرول روم کے مطابق جمعہ کی شام 4 بجے گنگا میں پانی کی سطح 78.94 میٹر ریکارڈ کی گئی جبکہ ہفتہ کو یہ 29 سینٹی میٹر بڑھ کر 79.23 میٹر ریکارڈ کیا گیا۔ اسی طرح نینی میں جمنا کی پانی کی سطح جمعہ کو 79.60 میٹر ریکارڈ کی گئی جو ہفتہ کی شام 4 بجے 21 سینٹی میٹر بڑھ کر 79.61 سینٹی میٹر ہو گئی۔
ذرائع نے بتایا کہ پہاڑوں سے میدانی علاقوں تک ہونے والی بارش کے بعد مدھیہ پردیش کی ندیاں تیز ہیں اور ہردوار سے 97022 کیوسک، ناروڑا سے 1,15,180 کیوسک اور کانپور بیراج سے 2,55,908 کیوسک پانی چھوڑا گیا ہے، جس کی وجہ سے دونوں دریاؤں میں پانی کی سطح بڑھ رہی ہے۔
مقامی لوگوں کا ماننا ہے کہ گنگا جی بندھوا میں واقع لیٹے شری بڑے ہنومان مندر کے پارک میں پہنچ گئی ہیں۔ گزشتہ ہفتے بجرنگ بلی ابھیشیک کے بعد گنگا واپس ہوگئی تھی، لیکن اب دوبارہ گنگا جی شری بڑے ہنومان مندر کی طرف بڑھ رہی ہے۔ لوگوں کا کہنا ہے کہ اگر یہی رفتار جاری رہی تو دیر شام یا کل صبح تک گنگا دوبارہ مندر میں داخل ہو سکتی ہے۔
