ہندوستان اپنے آئین کی طاقت سے آگے بڑھ رہا ہے: مودی

نئی دہلی (یو این آئی) وزیر اعظم نریندر مودی نے ہفتہ کو کہا کہ ہندوستان کی سب سے بڑی طاقت ہمارا آئین ہے، جس کی بنیاد پر ملک آگے بڑھ رہا ہے۔’یوم آئین’ کے موقع پر سپریم کورٹ کے احاطے میں منعقدہ تقریب سے خطاب کرتے ہوئے وزیر اعظم نے کہاکہ’آج کے عالمی حالات میں پوری دنیا کی نظریں ہندوستان پر لگی ہوئی ہیں۔ ہندوستان کی تیز رفتار ترقی، تیزی سے بڑھتی ہوئی معیشت اور مضبوط بین الاقوامی امیج کے درمیان دنیا ہماری طرف بڑی توقعات کے ساتھ دیکھ رہی ہے۔ اس سب کے پیچھے ہماری سب سے بڑی طاقت ہمارا آئین ہے۔
وزیر اعظم نے کہا کہ ہمارے آئین کی تمہید کے شروع میں ’’ہم عوام‘‘ لکھا ہوا ہے۔ یہ صرف تین الفاظ نہیں ہیں۔ یہ ایک کال ہے، ایک وعدہ ہے۔ ایک عقیدہ ہے۔”
انہوں نے کہا کہ آئین میں لکھا گیا یہ احساس ہندوستان کا بنیادی احساس ہے جو دنیا میں جمہوریت کی ماں رہا ہے۔ ‘مدر آف ڈیموکریسی’ رہی ہے۔ ہم ویشالی کی جمہوریہ اور ویدوں کے بھجن میں بھی یہی احساس دیکھتے ہیں۔وزیراعظم نے کہا کہ شہریوں کو خوش رکھنا، سچائی کے ساتھ کھڑا ہونا اور سادہ رویہ ریاست کا طرز عمل ہونا چاہیے۔ جدید تناظر میں ہندوستان کے آئین میں ملک کے ان تمام ثقافتی اور اخلاقی جذبات کو شامل کیا گیا ہے۔
مسٹر مودی نے کہاکہ ’’میں مطمئن ہوں کہ آج جمہوریت کی ماں کے طور پر ملک اپنے قدیم نظریات اور آئین کی روح کو مسلسل مضبوط کر رہا ہے۔ آج ‘عوام نواز’ جذبے کی طاقت سے ملک اور ملک کے غریبوں، ملک کی ماؤں بہنوں کو بااختیار بنایا جا رہا ہے۔
وزیراعظم نے کہا کہ آج عام آدمی کے لیے قوانین کو آسان بنایا جا رہا ہے۔ ہماری عدلیہ بھی بروقت انصاف کی فراہمی کے لیے مسلسل کئی بامعنی اقدامات کر رہی ہے۔مسٹر مودی نے کہا کہ اس بار 15 اگست کو انہوں نے لال قلعہ سے ذمہ داری پر زور دیا تھا۔ یہ ہمارے آئین کی روح کا مظہر ہے۔بابائے قوم کو یاد کرتے ہوئے وزیر اعظم نے کہاکہ ‘مہاتما گاندھی کہا کرتے تھے کہ ہمارے حقوق ہمارے فرائض ہیں، جنہیں ہم سچی دیانتداری اور لگن کے ساتھ پورا کرتے ہیں۔ آج امرت مہوتسو میں جب ہم آزادی کے 75 سال مکمل کر کے اگلے 25 سال کا سفر شروع کر رہے ہیں، آئین کا یہ منتر ملک کے لیے ایک قرار داد بن رہا ہے۔
مسٹر مودی نے کہاکہ”آزادی کا یہ امرت دور ملک کے لیے فرض کی مدت ہے، چاہے وہ افراد ہوں یا ادارے، ہماری ذمہ داریاں آج ہماری پہلی ترجیح ہیں۔ اپنے فرائض کو انجام دے کر ہم ملک کو ترقی کی نئی بلندیوں پر لے جا سکتے ہیں۔‘‘