واشنگٹن میں قائم "ہندوتواواچ” نامی تنظیم نے اپنی ایک رپورٹ میں یہ دعویٰ کیا
نئی دہلی: واشنگٹن میں قائم "ہندوتواواچ” نامی تنظیم نے اپنی ایک رپورٹ میں دعویٰ کیا ہے کہ ہندوستان میں رواں برس کے ابتدائی چھ ماہ کے دوران مسلمانوں کے خلاف روزانہ اوسطاً ایک سے زیادہ مرتبہ نفرت انگیز تقاریر کی گئیں اور یہ صورت حال ان ریاستوں میں زیادہ نمایاں رہی جہاں اگلے چند ماہ کے دوران ریاستی اسمبلیوں کے انتخابات ہونے والے ہیں۔
ہندوستان میں اقلیتوں کے خلاف ہونے والے تشدد کے واقعات پر نگاہ رکھنے والی اس تنظیم کے مطابق سن 2023 کی پہلی ششماہی میں مختلف میٹنگوں اور پروگراموں کے دوران مسلمانوں کے خلاف نفرت انگیز تقاریر کے 255 واقعات رپورٹ کیے گئے۔ حالانکہ جرمن خبررساں ادارہ "ڈوئچ ویلے” کا کہنا ہے کہ اس سلسلے میں سابقہ برسوں کا کوئی تقابلی ڈیٹا موجود نہیں ہے۔
"ہندو واچ ” کے دعوے کے مطابق اس نے نفرت انگیز تقریر کے متعلق اقوام متحدہ کی طے کردہ تعریف کو مدنظر رکھا ہے، جس میں کہا گیا ہے کہ "ابلاغ کی کوئی بھی ایسی شکل، جس میں مذہب، نسل، قومیت، رنگ، جنس یا دیگر شناختی عوامل کی بنیاد پر کسی فرد یا گروہ کے لیے متعصبانہ یا امتیازی زبان استعمال کی جائے۔”
اس رپورٹ کے مطابق نفرت انگیز تقاریر کے تقریباً 70 فیصد واقعات ان ریاستوں میں ہوئے جہاں سن 2023 اور 2024 میں انتخابات ہونے والے ہیں۔ ملک میں مسلمانوں کے خلاف نفرت انگیزی کے واقعات اب عام ہیں اور یہ معمول کا حصہ بنتے جا رہے ہیں۔ پچھلے دنوں پارلیمان میں بھی اس کا افسوس ناک مظاہرہ ہواتھا۔ حکمراں جماعت بھارتیہ جنتا پارٹی کے رکن رمیش بدھوڑی نے مسلم رکن پارلیمان کنور دانش علی کے خلاف جس طرح کے "نازیبا الفاظ” استعمال کیے اس کی ایک بڑے حلقے کی جانب سے مذمت بھی کی جا رہی ہے، لیکن افسوسناک صورتحال یہ بھی ہے کہ بھارتیہ جنتاپارٹی کے زیادہ تر قائدین اس ایشو پر خاموش ہیں،کچھ ایک نے لب کشائی کی بھی تو الٹے بد زبانی کرنے والے بی جے پی لیڈر کی حرکت کو ہی جائز ٹھہرانے کی کوشش کی۔
بہوجن سماج پارٹی کے رکن پارلیمان دانش علی نے اپنے کرب کا اظہار کرتے ہوئے پچھلے دنوں سوشل میڈیا پلیٹ فارم ایکس پر لکھا، "کیا آرایس ایس کی شاکھاؤں اور نریندر مودی جی کی لیبارٹری میں یہی سکھایا جاتا ہے؟ آپ کا کیڈر جب ایک منتخب رکن پارلیمان کو پارلیمنٹ میں … ایسے توہین آمیز الفاظ کہنے میں کوئی کسر نہیں چھوڑتا تو وہ عام مسلمانوں کے ساتھ کیا کرتا ہوگا؟ یہ سوچ کر بھی روح کانپ جاتی ہے۔”
یاد رہے کہ اس سے قبل جون میں بی جے پی کی حکومت والی اتراکھنڈ ریاست میں دیواروں پر ایسے پوسٹر چسپاں ملے تھے جن میں مسلمانوں کو علاقہ چھوڑ کر چلے جانے کی وارننگ دی گئی تھی۔ ‘دیو بھومی رکشا ابھیان’ نامی ایک ہندو گروپ نے یہ پوسٹر چسپاں کیے تھے۔
اقوام متحدہ سمیت متعدد بین الاقوامی تنظیمیں ہندوستان میں مسلمانوں کے ساتھ ہونے والی زیادتیوں اور انسانی حقوق کی خلاف ورزیوں کی شکایتیں کرتی رہی ہیں،لیکن ان فکر مندیوں کا حکومت ہند کا بہ ظاہر کوئی اثر دیکھنے کو نہیں ملتا۔حد تو یہ ہے کہ "ہیٹ اسپیچ” کا معاملہ عدالت عظمیٰ کی توجہ کا بھی کئی بار مرکز بن چکا ہے اور سپریم کورٹ کی جانب سے بھی کئی بار گہری تشویش ظاہر کی جاچکی ہے،لیکن اس کے باوجود صورتحال یہ ہے کہ جب کوئی چاہتا ہے،منہ اٹھا کر مسلمانوں کے خلاف زہر افشانی کرنے لگ جاتا ہے اور قانون نافذ کرنے والی ایجنسیاں خطاواروں پر ایکشن نہیں لیتیں۔کچھ معاملوں میں رسمی ایف آئی آر درج کرکے معاملہ کو ٹھنڈے بستے میں ڈالنے کی کوشش کرلی جاتی ہے۔
بہر حال !ہندوتوا واچ کی رپورٹ میں دعویٰ کیا گیا ہے کہ نفرت انگیز تقاریر کے سب سے زیادہ واقعات گجرات، مہاراشٹر، کرناٹک، مدھیہ پردیش اور راجستھان میں دیکھنے میں آئے۔ صرف مہاراشٹر میں، جہاں بی جے پی حکومت کا حصہ ہے، ایسے 29 واقعات درج کئے گئے۔ رپورٹ کے مطابق زیادہ تر نفرت انگیز تقریروں کے دوران سازشی نظریات کا ذکر کیا جاتا ہے جن کی کوئی ٹھوس بنیاد نہیں۔ مقررین نے ہندووں سے مسلمانوں کے خلاف تشدد اور ان کے سماجی اور اقتصادی بائیکاٹ کرنے تک کا مطالبہ کیا۔ ان واقعات میں سے تقریباً 80 فیصد ان ریاستوں میں پیش آئے جہاں وزیر اعظم نریندر مودی کی قیادت والی ہندو قوم پرست جماعت بی جے پی کی حکومت ہے۔ کچھ تجزیہ کاروں کا کہنا ہے کہ بی جے پی حکومت سن 2024 میں ہونے والے عام انتخابات میں ایک بار پھر اپنی کامیابی کو یقینی بنانے کے لیے نفرت انگیز تقریروں کے ذریعہ ہندو ووٹرو ں کی صف بندی کرنا چاہتی ہے۔
ہندوتوا واچ کے مطابق اس نے ہندو قوم پرست گروپوں کی آن لائن سرگرمیوں کا سراغ لگایا، سوشل میڈیا پر پوسٹ کی گئی نفرت انگیز تقاریر کی تصدیق شدہ ویڈیوز دیکھیں اورمیڈیا میں رپورٹ کیے گئے واقعات کی بنیاد پر اپنی یہ رپورٹ تیار کی ہے۔
مودی حکومت نے ہندوتوا واچ کی اس رپورٹ پر فی الحال کوئی ردعمل ظاہر نہیں کیا ہے تاہم وہ اقلیتوں کے ساتھ کسی طرح کی تفریق یا بدسلوکی کی خبروں سے انکار کرتی رہی ہے۔ تجزیہ کاروں کا کہنا ہے کہ سن 2014 میں نریندر مودی کے وزیر اعظم کے عہدے پر فائز ہونے کے بعد سے مسلمانوں کے خلاف تشدد اور منافرت کے واقعات میں اضافہ ہوا ہے۔
