عباس انصاری کومئو کی عدالت سے ملی ضمانت

مختار انصاری کے دوسرے فرزند کو بھی کورٹ نے ضابطہ اخلاق کی خلاف ورزی کے معاملے میں دی راحت

مئو( ہندوستان ایکسپریس ویب ڈیسک):اتر پردیش سے تعلق رکھنے والے رکن اسمبلی مختار انصاری کے دونوں بیٹوں عباس انصاری اور عمر انصاری نے اس وقت راحت کی سانس لی جب مئو کی ایک عدالت سے انھیں ضمانت مل گئی۔ مختار انصاری کے بڑے بیٹے مئو صدر سیٹ سے سہیل دیو بھارتیہ سماج پارٹی کے رکن اسمبلی ہیں اور ان کے ساتھ ساتھ چھوٹے بھائی عمر انصاری پر 2022 کے اسمبلی انتخاب کے دوران بغیر اجازت جلوس نکالنے اور بھیڑ جمع کرنے کو لے کر ضابطہ اخلاق کی خلاف ورزی معاملے میں مقدمہ درج کیا گیا تھا۔ اس معاملے میں مئو کی ایم پی-ایم ایل اے کورٹ کی جج شویتا چودھری نے دونوں بھائیوں کو ضمانت دینے کا فیصلہ کیا۔
قابل ذکر ہے کہ ضابطہ اخلاق کی خلاف ورزی معاملے میں یہ مقدمہ انتخاب کے وقت مئو شہر کوتوالی میں عباس انصاری اور ان کے چھوٹے بھائی سمیت کچھ دیگر لوگوں کے خلاف بھی درج کیا گیا تھا۔ آج جب اس معاملے میں سماعت ہو رہی تھی تو عباس انصاری کے کورٹ روم میں موجودگی کے وقت کچہری احاطہ کے اندر بڑی تعداد میں پولیس فورس تعینات کی گئی تھی۔ ضمانت ملنے کے بعد عدالت سے باہر نکلے عباس انصاری نے کہا کہ ’’ضمانتی دفعات میں وارنٹ تھا۔ اسی کے لیے عدالت کے سامنے پیش ہوئے تھے اور اب انصاف مل گیا ہے۔‘‘
عباس انصاری نے میڈیا سے بات کرتے ہوئے کہا کہ ’’اس معاملے میں میرے علاوہ میرے بھائی اور چچا بھی ملزم تھے۔ باقی سبھی کی ضمانت ہو چکی تھی۔ ہم لوگوں کی ضمانت بچی ہوئی تھی، اور آج ہمیں بھی ضمانت مل گئی۔‘‘