جے پور، 14 نومبر (یو این آئی) راجستھان میں 25 نومبر کو ہونے والے آئندہ اسمبلی عام انتخابات میں پہلی بار گھر بیٹھے ووٹنگ کی سہولت کے تحت اس بار منگل سے تقریباً 63 ہزار ووٹر ( بزرگ شہری اور معذور) ووٹ ڈالیں گے۔ریاست کے چیف الیکٹورل آفیسر پروین گپتا نے یہ بات بتائی۔راجستھان کا الیکشن ڈپارٹمنٹ جامع اور منصفانہ انتخابات کے عزم کے ساتھ کام کر رہا ہے اور الیکشن کمیشن آف انڈیا کی ہدایات کے مطابق، ریاست میں پہلی بار 80 سال سے زیادہ عمر کے بزرگ شہریوں اور 40 فیصد سے زائد معذوری کے زمرے کے خصوصی ووٹروں کے لیے اسمبلی عام انتخابات میں گھر بیٹھے ووٹ ڈالنے کا آغاز کیا گیا ہے۔ مسٹر گپتا نے کہا کہ منگل سے پوری ریاست میں ہوم ووٹنگ کا پہلا مرحلہ شروع کیا گیا ہے۔ ہوم ووٹنگ کے لیے زیادہ سے زیادہ 1401 ووٹر بیتو اسمبلی حلقہ سے ہیں، 855 ولبھ نگر سے، 819 ڈنگر پور، 652 مالویہ نگر، 666 سول لائنز اور 553 ووٹر ہوم ووٹنگ کے لیے شاہ پورہ اسمبلی حلقہ سے ہیں۔ وہیں ریاست میں سب سے کم ووٹروں کی تعداد کرولی اسمبلی حلقہ سے 15 ہے، اس کے بعد پپلڈا سے 65، ہندولی سے 81 اور تیجارہ سے 109 ہیں جنہوں نے اس سہولت کے لیے درخواست دی ہے۔انہوں نے کہا کہ 62 ہزار 927 اہل ووٹرز نے بطور متبادل اس سہولت کےلئے درخواست دی ہے۔ ریاست میں اسمبلی عام انتخابات میں پہلی بار دی جارہی اس سہولت کے لئے درخواست دینے کی آخری تاریخ گزشتہ چار نومبر تھی۔
