اسلام آباد: حکام کے مطابق ضلع موسٰی خیل کے علاقے راڑہ شم میں دہشت گردوں نے 23 افراد کو گاڑیوں سے اتار کر قتل کیا، شناخت کرنے کے بعد قتل کیے گئے افراد میں مسافروں کے ساتھ بسوں اور ٹرکوں کے ڈرائیورز بھی شامل ہیں، دہشت گردوں نے راڑہ شم میں کئی گاڑیوں کو بھی آگ لگائی ہے۔
اُدھر قلات میں دہشت گردوں نے 4 لیویز اہلکاروں اور پولیس سب انسپکٹر سمیت 10 افراد کو گولیاں مار کر قتل کردیا ہے، ضلع بولان کے علاقے کول پور سے 4 افراد کی لاشیں ملی ہیں۔مستونگ کے علاقے کھڈ کوچہ میں لیویز تھانے پر حملہ کیا گیا تھا جس کے بعد سیکیورٹی فورسز نے آپریشن کرکے تھانے سے قبضہ ختم کروایا ہے، بولان کے علاقے دوزان میں ریلوے پُل کو بارودی مواد کا دھماکا کرکے تباہ کر دیا گیا ہے۔ریلوے پُل تباہ ہونے کے بعد کوئٹہ کی سندھ اور پنجاب کے درمیان ریلوے ٹریفک معطل ہوگیا ہے۔اس درمیان خبر ہے کہ بلوچستان کے مختلف علاقوں میں دہشتگردوں کے ساتھ بہادری سے لڑتے ہوئے شہید ہونے والے اہلکاروں کی نماز جنازہ ادا کر دی گئی۔پاک فوج کے شعبہ تعلقات عامہ آئی ایس پی آر کے مطابق شہید سیکیورٹی اہلکاروں کی نماز جنازہ ایف سی ہیڈ کوارٹرز کوئٹہ میں ادا کی گئی۔
آئی ایس پی آر کے مطابق نماز جنازہ میں وزیراعلیٰ سرفراز بگٹی، کور کمانڈر بلوچستان، آئی جی ایف سی بلوچستان (نارتھ)، آئی جی پولیس و دیگر سول وملٹری حکام نے شرکت کی۔ آئی ایس پی آر کے مطابق نماز جنازہ کے بعد شہداء کے جسد خاکی اپنے آبائی علاقوں میں روانہ کردیے گئے، جہاں شہداء کو پورے فوجی اعزاز کے ساتھ سپرد خاک کیا جائے گا۔
