دہلی حکومت کی گاڑیوں کی آلودگی پر قابو پانے کے لیے افسران کو سخت ہدایات

نئی دہلی (یو این آئی) دہلی حکومت نے فضائی آلودگی میں 36 فیصد گاڑیوں اور 31 فیصد بائیو ماس برننگ کے حصے کو دیکھتے ہوئےگریپ 3 کی پابندی پر سختی سے عمل کرانے کے لئے محکمہ ٹرانسپورٹ اور دہلی پولیس ہدایت دی۔ دہلی کے وزیر ماحولیات گوپال رائے نے جمعہ کو آلودگی کے پیش نظر محکمہ ماحولیات اور ڈی پی سی سی کے افسران کے ساتھ جائزہ میٹنگ کی۔ اس کے بعد انہوں نے کہا کہ سائنس دانوں کے مطابق دہلی میں موجودہ فضائی آلودگی میں 36 فیصد گاڑیوں کی آلودگی اور 31 فیصد بائیو ماس برننگ کا کردار ہے، اس لیے محکمہ ٹرانسپورٹ اور دہلی پولیس کو ہدایت دی گئی ہے کہ وہ گریپ 3 پر پابندی کو سختی سے نافذ کریں۔ ساتھ ہی بائیو ماس برننگ کو روکنے کے لیے تمام متعلقہ محکموں کو خصوصی مہم چلانے کی ہدایات دی گئی ہیں۔
مسٹرگوپال رائے نے کہا کہ سردیوں میں آلودگی کی سطح میں اضافے کے پیچھے بائیو ماس برننگ، گاڑیوں کی آلودگی اور دھول ہے۔ اس کے ساتھ ساتھ سردیوں میں ہوا کی رفتار کم ہوتی ہے۔ انہوں نے کہا کہ میٹنگ کے دوران سائنس دانوں نے بتایا کہ دہلی اور این سی آر کی آلودگی میں فی الحال 36 فیصد گاڑیوں کی آلودگی اور 31 فیصد بائیو ماس جلنے کا حصہ ہے۔ انہوں نے کہا کہ گریپ-3 کے تحت بی ایس 3 پٹرول اوربی ایس 4 ڈیزل ایل ایم وی (4 پہیہ گاڑی) کے چلانے پر پابندی ہے۔ اگر کوئی اس کی خلاف ورزی کرتا ہے تو موٹر وہیکل ایکٹ 1988 کے تحت 20 ہزار روپے جرمانہ عائد کیا جائے گا۔ اس کے لیے محکمہ ٹرانسپورٹ کی جانب سے 84 ٹیمیں تعینات کی گئی ہیں۔ اس کے ساتھ ہی دہلی پولیس کی 284 ٹیمیں تعینات کی گئی ہیں۔انہوں نے کہا کہ ابھی دو تین دن تک آلودگی کی صورتحال ایسی ہی رہے گی۔ اس کے بعد بہتری کا امکان ہے۔ انہوں نے دہلی کے لوگوں سے اپیل کی کہ اگر وہ کسی کو کہیں بھی آلودگی پیدا کرتے ہوئے دیکھیں تو گرین دہلی ایپ پر اس کی شکایت کریں۔