جے این یو میں ڈاکٹر سید تقی عابدی کا ’’باقیات اقبال: اہمیت و افادیت‘‘ پر خصوصی لیکچر

نئی دہلی:ہندوستانی زبانوں کا مرکز،جے این یو اوروورلڈ اردو ایسوسی ایشن، نئی دہلی کی طرف سے ’باقیات اقبال: اہمیت و افادیت‘ پر ایک خصوصی خطبے کا انعقاد کیا گیا جس میں مہمان مقرر کی حیثیت سے ڈاکٹر سید تقی عابدی، کناڈا نے شرکت کی۔ اس موقع پر وورلڈ اردو ایسو سی ایشن کے چئیرمین پروفیسر خواجہ اکرام الدین نے تعارفی کلمات ادا کیا۔موصوف نے سید تقی عابدی کا تعارف کرواتے ہوئے کہا کہ ہمارے لیے خوش آئند بات ہے کہ عالمی شہرت یافتہ محقق اور ادیب ہمیں میسر ہیں اور ہم ان سے مستفید ہو سکتے ہیں۔
ہندوستانی زبانوں کا مرکز، جے این یو کے چیرپرسن پروفیسر سدھیرپرتاپ سنگھ نے شعبہ کی طرف سے مہمانوں کا استقبال کیا اور اپنے مختصر خطاب میں اردو کی ہمہ گیریت پر گفتگو کی۔ ڈاکٹر سید تقی عابدی’باقیات اقبال: اہمیت و افادیت‘ پر خطبہ دیتے ہوئے ڈاکٹر سید تقی عابدی نے کلام اقبال کا وہ حصہ جو اب تک شایع نہیں ہوا اس پر مثالوںسے دلائل دیے۔ علامہ اقبال کی باقیات کا شائع کرنا اور عوام الناس میں پہنچانا ایک اہم ادبی فریضہ ہے۔موصوف نے اقبال کے ابتدائی کلام کی نئی تواریخ اور نئے گوشے سامنے لائے۔اس کے علاوہ اقبال کے مکاتیب اور خطبات پر سیر حاصل گفتگو کی۔موصوف کی تحقیقی صلاحیت کا اندازہ اس سے لگایا جا سکتا ہے کہ انھوں نے ان تمام 65اخبار و جرائد کا حوالہ دیا جس میں اقبال کا کلام شایع ہوا تھا۔اس کے علاوہ اس تمام کلام کا حوالہ دیا جو اقبال نے اپنے کلام میں شامل نہیں کیا ان میں 30مکمل اور 26 متروک نظموں کا بھی ذکر ہے۔
خصوصی خطبے کی صدارت سابق چئیر پرسن ہندوستانی زبانوں کا مرکز ،جواہر لال نہرو یونیورسٹی پروفیسر سید انوار عالم (انورپاشا) نے انجام دیا۔موصوف نے سید تقی عابدی کے تحقیقی ذوق اور انتھک محنت کو سلام کرتے ہوئے کہا کہ ان کی تحقیقی پیرایے اور باریک بینی کی خصوصیات سے ریسرچ اسکالر ز بہت استفادہ کرسکتے ہیں۔ مہمان خصوصی کی حیثیت سے پروفیسر اخلاق احمدآہن نے پروگرام میں شرکت کی اور اقبال کے فارسی کلام پر مختصر مگر جامع گفتگو کی۔
اس موقع پرڈاکٹر سید تقی عابدی کی چار کتابوں کا رسم اجرا بھی عمل میں آیا۔ان میں ’’مقالات حالی، سید تقی عابدی کے مضامین کا بن، سید تقی عابدی: تعارف، تقاریب، تاثرات اول اور دوم‘‘ خاص طور پر قابل ذکر ہیں۔اس کے علاوہ موریشس سے تشریف لائیں خاتون ناول نگار نوشین نورمحمد کا ناول ’’بالکونی‘‘کا اجرا بھی عمل میں آیا۔ نظامت کے فرائض مشہور ناظم و استاذ ڈاکٹر شفیع ایوب ، جے این یو نے جب کہ شکریہ ڈاکڑ محمد رکن الدین ڈائریکٹر ،ورلڈ اردو ایسوسی ایشن، نے ادا کیا۔ اس خصوصی لیکچر میں ڈاکٹر شیو پرکاش، ڈاکٹر محمد جلیل اقبال خاکی، محمد شہباز رضا، پرویز عالم، نثار احمد، طریق العابدین،محمدعارف، شاذیہ،عبد الحکیم نرگس فاطمہ، انیم قادری کے علاوہ بڑی تعداد میں ریسرچ اسکالرز اور طلبا و طالبات موجود تھے۔