کلکتہ 4اکتوبر(یواین آئی) اساتذہ تقرری گھوٹالہ میں ایک بار پھر ای ڈی نے ابھیشیک بنرجی کو سمن جاری کرتے ہوئے اگلے پیر کو سالٹ لیک کے سی جی او کمپلیکس میں طلب کیا ہے اس سے قبل ای ڈی نے ابھیشیک بنرجی کولپس اینڈ باؤنڈ کیس میں پوچھ گچھ کے لیے 3 اکتوبر کو صبح10.30بجے سی جی او کمپلیکس میں حاضر ہونے کی ہدایت دی تھی ترنمول کانگریس کے آل انڈیا جنرل سکریٹری نے پہلے ہی اعلان کردیا تھا کہ وہ منگل کو ای ڈی کے سمن پر حاضر نہیں ہوں گے ۔کیوں کہ وہ دہلی میں ترنمول کانگریس کے احتجاج کی وجہ سے مصروف ہیں ۔ترنمو ل کانگریس 100دن کام کے اسکیم کی فنڈنگ روکے جانے کے خلاف ابھیشیک بنرجی کی قیادت میں پیر اور منگل کودہلی میں احتجاج کررہی تھی۔ بنگال کی حکمراں جماعت نے الزام لگایا تھا کہ ای ڈی کو ابھیشیک بنرجی کے پہلے سے طے شدہ پروگرام کا علم ہونے کےباوجود انہیں سمن جاری کیا گیا اور اس کا مقصد واضح ہے ۔منگل کو ابھیشیک بنرجی نے ڈویژن بنچ سے رجوع کیا اور پیشی سے بچنے کے لئے ہائی کورٹ کی سنگل بنچ کے حکم کو چیلنج کیا۔ قابل ذکر ہے کہ ابھیشیک کی ماں لتا بنرجی اور والد امیت بنرجی کو بھی ای ڈی نے اساتذہ تقرری گھوٹالہ میںپوچھ گچھ کے لیے طلب کیا ہے۔ ای ڈی ذرائع کے مطابق ابھیشیک کی بیوی روجیرا کو بھی اگلے ہفتے طلب کیا گیا ہے۔
اس سے پہلے کلکتہ ہائی کورٹ نےلپس اینڈ باؤنڈز کیس میں ابھیشیک کی ماں لتا کی جائیداد کا حساب مانگا تھا۔ جسٹس امریتا سنگھ نے اس معاملے میں ای ڈی کی تحقیقات پر ناراضگی ظاہر کی تھی۔ انہوں نے کہاتھا اس تحقیقات کا نتیجہ صفر ہے۔ کیونکہ، ای ڈی کمپنی اور کمپنی کے سی ای او ابھیشیک کے بارے میں تفصیلات نہیں دے سکی ہے۔ جسٹس سنگھ نے اس سلسلے میں کچھ اور معلومات عدالت میں پیش کرنے کا حکم دیا۔ اس فہرست میں ابھیشیک کی والدہ لتا کی جائیداد کا ریکارڈ بھی شامل ہے۔منگل کو ابھیشیک نے ڈویژن بنچ سے رجوع کیا اور پیشی سے بچنے کے لئے ہائی کورٹ کی سنگل بنچ کے حکم کو چیلنج کیا۔ اس تناظر میں جسٹس سومن سین نے اپنے مشاہدے میں کہا کہ ابھیشیک کو پہلے ہی ای ڈی کو مطلع کر دینا چاہیے تھا کہ وہ پیش نہیں ہوں گے۔ کیس کی سماعت بدھ کو ہوگی۔ منگل کو، ابھیشیک کے وکیل نے ہائی کورٹ کو بتایاکہ جب بھی سیاسی پروگرام ہوتے ہیں ابھیشیک کو طلب کرلیا جاتا ہے۔ قبل ازیں انہوں نے پروگرام منسوخ کر کے ای ڈی کے سامنے پیش ہوچکے ہیں مگر منگل کے پروگرام کو منسوخ کرنا ممکن نہیں تھا۔
دوسری طرف، ابھیشیک بنرجی نے سنگل بنچ کے حکم کو چیلنج کرتے ہوئے ڈویژن بنچ میں حاضر ہونے کے لیے کچھ اور وقت مانگا ہے۔ ابھیشیک کی دلیل تھی کہ ای ڈی نے ان سے جو دستاویز مانگے ہیں وہ تقریباً 10 سال پرانے ہیں۔ اسے جمع کرنے کے لیے کافی وقت درکار ہے۔ اس معاملے کی آج پھر سماعت ہورہی ہے ۔دیکھنا ہوگا کہ عدالت کیا فیصلہ کرتی ہے۔اس سے قبل ای ڈی نے ایک اور معاملے میں انہیں طلب کرلیا ہے۔
