آئین کو بچانے کی مہم میں سب کو قربانیاں دینی ہوں گی: یوگیندر یادو

نئی دہلی، 20 مئی ( یواین آئی ) ماہر سماجیات یوگیندر یادو نے کہا ہے کہ آئین کو بچانے کی مہم میں تمام ہم وطنوں کو قربانیاں دینی ہوں گی، تب ہی ملک بچ سکے گا۔مسٹریادو نے یہ بات پیر کو یہاں آئین کے تحفظ کے لیے یونائیٹڈ فرنٹ آف سوشل آرگنائزیشنز کے زیر اہتمام ایک میٹنگ میں کہی۔ اس میٹنگ میں سب کو آئین کی حفاظت کا حلف لیتے ہوئے آئین ہند کی کاپی پیش کی گئی۔یونائیٹڈ فرنٹ کے چیف کنوینر ہرنام سنگھ نے کہا کہ دہلی اور قومی راجدھانی خطہ میں سیکڑوں میٹنگ کرکے آئین اور جمہوریت مخالف حکومت کو تبدیل کرنے کی مہم چلائی گئی ہے، جس کے نتیجے میں آج ہزاروں لوگ نے اس پروگرام میں شرکت کی ۔ انہوں نے کہا کہ ہندوستان کی روح آئین میں ہے اور ملک کے پسماندہ طبقات کو دیئے گئے آئینی حقوق کا ہر قیمت پر تحفظ کیا جائے گا۔پروگرام میں دیگر مقررین نے بھی اپنے خیالات کا اظہار کیا۔