نئی دہلی(ہندوستان ایکسپریو ویب ڈیسک): وزیر خارجہ ہندایس جے شنکر 18 سے 28 ستمبر امریکہ کے 10 روزہ دورہ پر روانہ ہو گئے ہیں۔ وزارت خارجہ نے کہا کہ 18 سے 24 ستمبر تک نیویارک کے اپنے دورہ کے دوران، جے شنکر اقوام متحدہ کی جنرل اسمبلی (یو این جی اے) کے 77 ویں اجلاس میں ہندوستانی وفد کی قیادت کریں گے۔ 77ویں یو این جی اے کا موضوع ’’لمحہ فکریہ: باہم مربوط مسائل کا انقلابی حل‘‘ ہے۔
وزیر خارجہ جے شنکر کثیرجہتی کے تئیں ہندوستان کی عہد بندی کو مدنظر رکھتے ہوئے (جی 4 ہندوستان، برازیل، جاپان، جرمنی) کی وزارتی میٹنگ کی میزبانی کریں گے، ساتھ ہی وہ اقوام متحدہ کی سلامتی کونسل میں جامع اصلاحات اور کثیر جہتی کے موضوع پر L-69 گروپ کی اعلیٰ سطحی میٹنگ میں بھی شرکت کریں گے۔وہ جی 20 اور یو این ایس سی کے رکن ممالک کے وزرائے خارجہ سمیت دیگر مندوبین کے ساتھ دو طرفہ ملاقاتیں بھی کریں گے۔ اقوام متحدہ کی جنرل اسمبلی کے 77 ویں اجلاس سے جے شنکر کا خطاب 24 ستمبر کی دوپہر کو ہونے کی توقع ہے۔اقوام متحدہ جنرل اسمبلی کی مصروفیت کے بعد جے شنکر 25 تا 28 ستمبر واشنگٹن ڈی سی کا دورہ کریں گے اور امریکی عہدیداروں کے ساتھ باہمی امور پر تبادلہ خیال کریں گے۔ امریکی ہم منصب انٹونی بلنکن کے ساتھ خارجی امور پر تبادلہ خیال کے علاوہ امریکی انتظامیہ کے سینئر ارکان، امریکی بزنس لیڈرس سے بھی دونوں ممالک کے درمیان اہم امور اور تعاون و اشتراک پر بات چیت کی جائے گی۔ راونڈ ٹیبل اجلاس میں ایس این ٹی پر توجہ مرکوز کی جائے گی۔ جے شنکر اس موقع پر ہندوستانی برادری سے بھی خطاب کریں گے۔
