وزیر داخلہ نے مردم شماری کی تیاریوں کا جائزہ لیا

نئی دہلی، 15 جون (یواین آئی) ملک میں مردم شماری کرانے کا نوٹیفکیشن جاری ہونے سے ایک دن پہلے، مرکزی وزیر داخلہ امت شاہ نے اتوار کو یہاں مرکزی داخلہ سکریٹری، رجسٹرار جنرل اور مردم شماری کمشنر اور دیگر سینئر افسران کے ساتھ آئندہ مردم شماری کی تیاریوں کا جائزہ لیا۔مردم شماری کرانے کا نوٹیفکیشن پیر کو سرکاری گزٹ میں شائع کیا جائے گا۔
وزارت داخلہ کے مطابق مردم شماری دو مرحلوں میں کی جائے گی۔ پہلے مرحلے یعنی گھروں کی فہرست تیار کرنے کے آپریشن (ایچ ایل او) میں ہر گھر کی رہائشی حیثیت، جائیداد اور سہولیات کی تفصیلات جمع کی جائیں گی۔ اس کے بعد دوسرے مرحلے میں یعنی آبادی کی گنتی (پی ای) میں ہر گھر میں ہر فرد کی آبادیاتی، سماجی، اقتصادی، ثقافتی اور دیگر معلومات اکٹھی کی جائیں گی۔ مردم شماری میں ذات پات کی گنتی بھی کی جائے گی۔
مردم شماری سرگرمیوں کے لئے تقریباً 34 لاکھ شمار کنندگان اور سپروائزر اور تقریباً ایک لاکھ 30 ہزار مردم شماری کارکن تعینات کیے جائیں گے۔
یہ مردم شماری آغاز سے اب تک کہ 16ویں اور آزادی کے بعد کی 8ویں مردم شماری ہے۔
آئندہ مردم شماری موبائل ایپلیکیشنز کے ذریعے ڈیجیٹل طریقے سے کی جائے گی۔ لوگوں کو خود گنتی کا التزام بھی فراہم کرایا جائے گا۔ جمع کرنے، ترسیل اور ذخیرہ کرنے کے وقت ڈیٹا کی حفاظت کو یقینی بنانے کے لیے انتہائی سخت ڈیٹا سیکیورٹی اقدامات نافذ کیے جائیں گے۔