نئی دہلی ( یواین آئی ) بھارتیہ جنتا پارٹی (بی جے پی) کی قومی رکنیت سازی مہم کے ارکان کی تعداد آٹھ دنوں میں دو کروڑ سے تجاوز کر گئی ہے۔پارٹی کے صدر جگت پرکاش نڈا، مرکزی وزیر داخلہ امت شاہ اور پارٹی کے قومی تنظیم کے جنرل سکریٹری بی ایل سنتوش نے نو ریاستوں اتر پردیش، بہار، چھتیس گڑھ، مدھیہ پردیش، اڈیشہ، کرناٹک، تمل ناڈو، گجرات اور راجستھان میں رکنیت سازی مہم کے جائزہ کے لیے مختلف میٹنگ کا انعقاد کیا جس میں ریاستی صدر، جنرل سکریٹری، ممبر شپ ہیڈ، ممبر شپ گروپ کے عہدیداروں نے شرکت کی۔
میٹنگ کے بعد پارٹی کے جنرل سکریٹری ونود تاوڑے نے آج شام یہاں نامہ نگاروں سے بات کرتے ہوئے کہا کہ بی جے پی کے ’سنگٹھن پرو‘ کے تحت 02 ستمبر کو وزیر اعظم نریندر مودی نے پارٹی کا پہلا رکن بن کر بی جے پی کی قومی رکنیت مہم کا آغاز کیا تھا۔ رکنیت سازی مہم کے تحت صرف آٹھ دنوں میں بی جے پی کی رکنیت کی تعداد دو کروڑ سے تجاوز کر گئی ہے۔
مسٹر تاوڑے نے کہا کہ اس رکنیت سازی مہم کے تناظر میں قومی صدر ،مسٹر نڈا، وزیر داخلہ امت شاہ اور قومی تنظیم کے جنرل سکریٹری مسٹر سنتوش نے پارٹی کے مرکزی دفتر میں نو ریاستوں کے ساتھ الگ الگ میٹنگیں کیں اور رکنیت سازی مہم کا جائزہ لیا۔ ان میٹنگوں میں اتر پردیش، بہار، چھتیس گڑھ، مدھیہ پردیش، اڈیشہ، کرناٹک، تمل ناڈو، گجرات اور راجستھان کے ریاستی صدور، جنرل سکریٹریز، رکنیت کے سربراہان، ممبرشپ ٹیم کے عہدیداروں نے شرکت کی۔
