ہند-بنگلہ دیش کے قومی سلامتی کےمشیروں کی ملاقات

نئی دہلی، 20 نومبر (یو این آئی) قومی سلامتی کے مشیر اجیت ڈوبھال نے ہندوستان کے دورے پر آئے ہوئے بنگلہ دیش کے قومی سلامتی کے مشیر خلیل الرحمٰن کے ساتھ جمعرات کو یہاں دونوں ممالک کے سلامتی کے منظرنامے پر تفصیل سے تبادلۂ خیال کیا۔
مسٹر خلیل الرحمٰن ساتویں کولمبو سیکیورٹی کانفرنس میں شرکت کے لئے ہندوستان آئے ہیں۔کانفرنس کے علاوہ، اجیت ڈوبھال اور خلیل الرحمٰن کے درمیان سلامتی سے متعلق مختلف امور پر تبادلۂ خیال ہوا۔ انہوں نے دو طرفہ اور علاقائی سلامتی کو متاثر کرنے والے متعدد اہم امور پر تبادلہ خیال کیا۔۔
ذرائع کے مطابق، دونوں رہنماؤں نے خفیہ معلومات کے تبادلے، سرحدی انتظام، اور دہشت گردی، منشیات کی اسمگلنگ اور سرحد پار جرائم سے نمٹنے کے لیے مشترکہ کوششوں کو مضبوط کرنے کے عزم کی توثیق کی۔ذرائع نے یہ بھی بتایا کہ دونوں فریقوں نے تقریباً 4,000 کلومیٹر طویل ہند۔بنگلہ دیش سرحد پر آپریشنل ہم آہنگی کو بہتر بنانے کے طریقوں پر غور کیا، جس میں غیر قانونی سرگرمیوں کی روک تھام اور سرحدی علاقوں میں رہنے والی آبادی کے تحفظ پر خصوصی توجہ دی گئی۔