ایشیا کپ کے دلچسپ مقابلہ میں آخری اوور کی چوتھی گیند پرپانڈیا نے چھکا لگا کر روایتی حریف کے دانت کھٹے کردئے
دبئی (ایجنسیاں)ایشیا کپ 2022 کا سنسنی خیز مقابلہ ہندوستان نے آخری اوور میں 5 وکٹوں سے جیت لیا۔ پاکستان کی جانب سے دیا گیا 148 رنز کا ہدف ہندوستان مقابلہ کے بالکل آخری مرحلے میں اس وقت حاصل کیا،جب صرف 2 گیندکا کھیل باقی تھا ۔ حالانکہ اننگز کے آغاز میں ہندوستان کے اوپننگ بلے باز کے ایل راہل بغیر کوئی رن بنائے پہلی ہی گیند پر نسیم شاہ کی گیند پر بولڈ ہوئے۔ ایک کے ہی مجموعے پر تجربہ کار ویراٹ کوہلی کا کیچ ڈراپ ہوا جس کے بعد انہوں نے کپتان روہیت شرما کے ہمراہ 49 رنز کی شراکت بنائی۔
50 کے مجموعے پر محمد نواز نے 12 رنز بنانے والے روہیت شرما جبکہ 53 پر 35 رنز بنانے والے ویراٹ کوہلی کو کیچ آؤٹ کروایا۔ ایسے میں رویندرا جادیجا نے پہلے سریا کمار یادیو کے ساتھ 36 اور پھر ہادیک پانڈیا کے ساتھ 52 رنز کی پارٹنر شپ بنا کر ٹیم کو ہدف کے قریب کردیا۔
میچ آخری اوور تک گیا تو ایسے موقع پر 35 رنز بنانے والے رویندرا جدیجا کو محمد نواز نے بولڈ کردیا، تاہم آخری اوور کی چوتھی گیند پر پانڈیا نے چھکا لگا کر ہندوستانی ٹیم کو فاتح بنایا۔ ہاردیک پانڈیا نے 17 گیندوں پر 33 رنز کی دھواں دار اننگز کھیلی۔
پاکستان کی جانب سے اپنا پہلا ٹی ٹوئنٹی کھیلنے والے نسیم شاہ نے 2 وکٹیں لیں جبکہ اسپنر محمد نواز کے حصے میں 3 اہم وکٹیں آئیں۔ خیال رہے کہ پہلے بیٹنگ کرتے ہوئے پاکستان ٹیم آخری اوور میں 147 رنز بنا کر آل آؤٹ ہوگئی تھی۔ محتاط انداز میں اننگز کا آغاز کرنے کے بعد قومی ٹیم کو 15 رنز پر پہلی وکٹ سے محروم ہونا پڑا جب بابر اعظم پل شاٹ کھیلنے کی کوشش میں کیچ آؤٹ ہوئے جبکہ 42 کے مجموعے پر فخر زمان کیپر کو کیچ دے بیٹھے۔ دونوں نے 10، 10 رنز بنائے۔تیسری وکٹ پر محمد رضوان اور افتخار احمد نے 45 رنز کی پارٹنر شپ بنائی جہاں 87 کے مجموعے پر افتخار احمد 28 رنز بنا کر آؤٹ ہوئے۔
اس کے بعد محمد رضوان 43 رنز بنانے کے بعد 96 پر جبکہ 2 رنز بنانے والے خوشدل شاہ 97 پر پویلین لوٹے۔
خیال رہے کہ قومی ٹیم کے ابتدائی پانچوں کھلاڑی شاٹ گیند پر آؤٹ ہوئے۔
ہندوستانی گیند بازوں نے پاکستان کے ہارڈ ہٹرز کی بھی ایک نہ چلنے دی آصف علی 9 رنز بنانے کے بعد آسان کیچ دے کر آؤٹ ہوئے تو محمد نواز ایک رن بنا کر کٹ مارتے ہوئے کیپر کو کیچ دے بیٹھے۔آٹھویں آؤٹ ہونے والے کھلاڑی شاداب خان تھے جو 128 کے مجموعے پر شاداب خان 10 رنز بنا کر بھونیشور کمار کی گیند پر آؤٹ ہوئے تو اگلی ہی گیند پر نسیم شاہ بھی ایل بی ڈبلیو آؤٹ ہوگئے۔اننگز کے اختتامی لمحات میں شاہنواز ڈھانی نے 6 گیندوں پر 16 رنز بنا کر جبکہ حارث رؤف نے 7 گیندوں پر 13 رنز بنا کر ٹیم کو 147 کے ٹوٹل پر پہنچایا جہاں قومی ٹیم آل آؤٹ ہوئی۔
ہندوستان کی جانب سے بھونیشور کمار 4 وکٹیں لے کر نمایاں رہے جبکہ ہاردیک پانڈیا نے بھی 3 اہم وکٹیں لے کر پاکستانی بولنگ لائن کو نقصان پہنچانے میں اپنا کردار ادا کیا۔دبئی کرکٹ اسٹیڈیم میں کھیلے جارہے اس میچ میں ہندوستان نے ٹاس جیت کر پہلے بولنگ کرنے کا فیصلہ کیا تھا۔
ٹاس کے موقع پر ہندوستانی کپتان روہیت شرما کا کہنا تھا کہ ’میرا نہیں خیال کہ ٹاس بہت اہم ہے، یہاں کئی سالوں سے کھیلتے ہوئے میرا خیال تھا کہ اگر آپ کے سامنے اسکور ہونا اچھی بات ہے۔انہوں نے یہ بھی کہا پچ پر گھاس موجود ہے اور اہم اس کا فائدہ اٹھانا چاہتے ہیں۔ پاکستانی کپتان بابر اعظم کا کہنا تھا کہ ہم بھی پہلے گیندبازی کرنا چاہتے تھے، لیکن ٹاس ہمارے ہاتھ میں نہیں۔انہوں نے بتایا کہ قومی ٹیم میں تین فاسٹ بولرز ہیں، جہاں نسیم شاہ اپنا ڈیبیو کر رہے ہیں جبکہ دو اسپنرز بھی شامل کیے گئے ہیں۔ بابر اعظم کی قیادت میں پاکستانی ٹیم میں محمد رضوان، فخر زمان، افتخار احمد، خوشدل شاہ، آصف علی، شاداب خان، محمد نواز، نسیم شاہ، حارث رؤف اور شاہنواز دھانی شامل ہیں۔
ہندوستانی ٹیم کپتان روہت شرما، لوکیش راہول، ویراٹ کوہلی، سریاکمار یادو، دنیش کارتھک، ہاردیک پانڈیا، رویندرا جادیجا، بھونیشور کمار، اویش خان، یوزویندر چہل اور ارشدیپ سنگھ پر مشمتمل ہے۔
