ڈاکٹر سنیل راؤکو رائل بحرین اسپتال نے فوری اثر سے عہدے سے برطرف کردیا
نئی دہلی: ہندوستانی نژاد ڈاکٹر کو اسرائیل اور حماس کے درمیان جاری تنازعہ کے درمیان سوشل میڈیا پر فلسطین مخالف تبصرے پوسٹ کرنے کے بعد رائل بحرین اسپتال نے انہیں عہدے سے برطرف کردیا ہے۔انڈیا ٹوڈے کی خبر کے مطابق ڈاکٹر سنیل راؤ نے ایکس (سابقہ ٹویٹر) پرفلسطین اور اسرائیل کے درمیان جاری جنگ کے حوالے سے کئی پوسٹس پوسٹ کیا تھا جس میں میڈیا رپورٹ کے مطابق انہوں نے اسرائیلی بربریت کو جائز ٹھہرانے کی کوشش کی تھی۔ ایکس پر ایک صارف نے اس ٹویٹس کا نوٹس لیا اور اس پر بحرینی حکام کی توجہ دلائی۔
بہرحال رائل بحرین ہسپتال نے ایکس پر ڈاکٹر راؤ کے پوسٹ کے حوالے سے ایک بیان جاری کرتے ہوئے کہا، "یہ بات ہمارے علم میں آئی ہے کہ ڈاکٹر سنیل راؤ، جو اندرونی ادویات کے ماہر کے طور پر کام کر رہے ہیں، نے سوشل میڈیا پر ایسی ٹویٹس پوسٹ کی ہیں جو ہمارے معاشرے کے لیے ناگوار ہیں۔ ہم اس بات کی تصدیق کرنا چاہیں گے کہ ان کی ٹویٹس اور نظریہ ذاتی ہے اور ہسپتال اس نظریے واقدار کی عکاسی نہیں کرتا۔ یہ ہمارے ضابطہ اخلاق کی خلاف ورزی ہے، اور ہم نے ضروری قانونی کارروائی کی ہے، اورفوری اثرسے ان کی سروس ختم کر دی گئی ہے۔”
خبر یہ بھی ہے کہ اس معاملہ میں ڈاکٹر راؤ نے اپنے بیانات کی غیر حساسیت کو تسلیم کرتے ہوئے ایکس پر معافی نامہ بھی جاری کیا۔ انہوں نے لکھا، "میں نے اس پلیٹ فارم پر جو بیان پوسٹ کیا اس کے بارے میں معذرت چاہتا ہوں۔ موجودہ واقعہ کے تناظر میں یہ غیر حساس تھا۔ ایک ڈاکٹر کے طور پر، تمام زندگیوں کی اہمیت ہے۔ میں اس ملک، اس کے لوگوں اور اس کے مذہب کا دل سے احترام کرتا ہوں۔ جیسا کہ میں یہاں پچھلے 10 سالوں سے ہوں۔”
مزید برآں، ہسپتال نے اپنی ویب سائٹ سے ڈاکٹر راؤ کا پروفائل ہٹا دیا۔ ڈاکٹر سنیل راؤ، اپنے ٹویٹر پروفائل کے مطابق، تقریباً 20 سال کے تجربے کے ساتھ اندرونی ادویات کے ماہر ہیں۔ وہ وشاکھاپٹنم میں آندھرا میڈیکل کالج اور کرناٹک کے منگلورو میں کستوربا میڈیکل کالج کے سابق طالب علم ہیں۔
یہ پیش رفت اسرائیل اور حماس کے درمیان بڑھتے ہوئے تنازعے کے درمیان سامنے آئی ہے، جس میں اب تک دونوں طرف سے 5000 سے زیادہ جانیں جا چکی ہیں۔ جنگ 7 اکتوبر کو اسرائیل کے خلاف حماس کے اچانک حملے کے بعد شروع ہوئی تھی۔اسرائیل اب غزہ کی پٹی میں زمینی کارروائی شروع کرنے کی تیاری کر رہا ہے، اس سے قبل وزیر اعظم بنجمن نیتن یاہو نے کہا تھا کہ وہ "حماس کو صفحہ ہستی سے مٹا دیں گے”۔
