دی ہیگ (یو این آئی) امریکی صدر ڈونلڈ ٹرمپ نے اعتراف کیا ہے کہ جنگ کے آخری دنوں میں ایران کی جانب سے اسرائیل کو بڑی مار پڑی ہے۔امریکی صدر ڈونلڈ ٹرمپ نیٹو سربراہی کانفرنس میں گفتگو میں اعتراف کیا کہ جنگ کے آخری دو دن میں ایران سے اسرائیل کو بہت بُری مار پڑی ہے، ایرانی بیلسٹک میزائلز نے اسرائیل کی متعدد عمارتوں کو نشانہ بنایا ہے جس سے کئی عمارتیں تباہ ہوئیں۔ٹرمپ کا کہنا تھا کہ ایران کے لوگ شاندار ہیں، یہ سب کے لئے بڑی کامیابی ہے، جنگ بندی ایران سمیت سب کیلئے بڑی جیت ہے، ایرانی شاندار لوگ ہیں۔امریکی صدر نے کہا کہ ایران اسرائیل جنگ سے سویلین کو نقصان پہنچا، ایران اور اسرائیل اسکول کے بچوں کی طرح لڑے، میرا نہیں خیال کہ ایران اور اسرائیل اب ایک دوسرے سے لڑیں گے۔امریکی صدر ڈونلڈ ٹرمپ نے مزید کہا کہ جنگ بندی کی تھوڑی بہت خلاف ورزی ہوئی تھی لیکن اب اسرائیل ایران سیز فائر پر اچھے سے عمل ہورہا ہے، میرے کہنے کے بعد اسرائیلی طیارے واپس آگئے۔
دریں اثناء ایک یورپی اہلکار کے مطابق مسٹر ٹرمپ نے 22 جون کو ایران کے جوہری تنصیبات پر بی-2 لڑاکا طیاروں کو حملہ کرنے کا حکم دینے سے پہلے یورپی اتحادیوں کو خبردار نہیں کیا تھا۔ تاہم، مسٹر ٹرمپ نے کینیڈا میں جی-7 سربراہی اجلاس میں ایسا حملہ کرنے کا ارادہ ظاہر کیا تھا۔ساتھ ہی اسکائی نیوز نے ڈاؤننگ اسٹریٹ کے ذرائع کے حوالے سے بتایا کہ برطانوی حکومت کو اس حملے کے بارے میں پیشگی اطلاع دی گئی تھی۔
اسرائیل نے ایران پر خفیہ فوجی جوہری پروگرام کا الزام لگایا اور 13 جون کو ایک بڑا فوجی آپریشن شروع کیا جس سے مشرق وسطیٰ کی صورتحال مزید خراب ہو گئی۔ جواب میں ایران نے ‘آپریشن ٹرو پرومیس III’ شروع کیا اور اسرائیلی فوجی اڈوں پر حملہ کیا۔ 22 جون کو امریکہ نے تین ایرانی جوہری تنصیبات نتنز، فردو اور اصفہان پر حملہ کرکے اسرائیل کی کارروائی کی حمایت کی۔ حملے کے بعد مسٹر ٹرمپ نے کہا کہ ایران کو اب جنگ ختم کرنی ہوگی ورنہ اسے مزید سنگین نتائج کا سامنا کرنا پڑے گا۔قابل ذکر ہے کہ امریکی حملے کے جواب میں ایران نے پیر کو قطر میں امریکی العدید ایئربیس پر میزائل حملہ کیا تھا، حالانکہ تقریباً تمام میزائلوں کو ناکارہ بنا دیا گیا تھا اور کوئی جانی نقصان نہیں ہوا تھا۔مسٹر ٹرمپ نے کہا کہ اسرائیل اور ایران نے جنگ بندی پر اتفاق کیا ہے جس کی تصدیق انہوں نے منگل کو کی۔ ایران نے واضح طور پر اس بات کی تردید کی ہے کہ اس کے جوہری پروگرام کا کوئی فوجی مقصد ہے۔
اسی درمیان اسرائیلی وزیر اعظم نیتن یاہو نے ٹرمپ کی قصیدہ خوانی کرتےہوئے کہا کہ اسرائیل کو آج تک وائٹ ہاؤس میں ٹرمپ سے بہتر کوئی دوست نہیں ملا۔غیر ملکی خبر رساں ادارے کے مطابق ایک بیان میں اسرائیلی وزیراعظم نے ٹرمپ کا بیانیہ دہراتے ہوئے کہا کہ اگر ایران نے ایٹمی منصوبے کی دوبارہ کوشش کی تو ناکام بنائیں گے۔اسرائیلی وزیراعظم کا کہنا تھا کہ اپنے وجودکیلئے 2 خطروں، ایٹمی اور میزائل منصوبے کو ختم کردیا، ایران کے خلاف تاریخی کامیابی حاصل کی، جو نسلوں تک یاد رہے گی۔نیتن یاہو نے مزید کہا کہ اسرائیل کو آج تک وائٹ ہاؤس میں ٹرمپ سے بہتر کوئی دوست نہیں ملا، ہم حماس کو شکست دیں گے اور غزہ سے زندہ اور مردہ یرغمالیوں کو واپس لائیں گے۔
