جڈیجہ کے والد کی بہو کے خلاف” ٹائٹ فیلڈنگ”

احمد آباد(ہندوستان ایکسپریس ویبڈیسک):گجرات میں یکم دسمبر اور 5 دسمبر کو دو مراحل میں اسمبلی انتخاب کی تاریخ مقرر ہے۔ سبھی پارٹیوں نے اپنی طرف سے کوئی کسر نہیں چھوڑ رکھی ہے، اور اپنے امیدواروں کی جیت کے لیے پورا زور لگا دیا ہے۔ اس درمیان ایک ایسی خبر سامنے آ رہی ہے جو بی جے پی کے لیے فکر انگیز ہے۔ دراصل کرکٹر رویندر جڈیجہ کی بیوی ریوابا جڈیجہ جام نگر شمال سیٹ سے بی جے پی امیدوار کے طور پر کھڑی ہوئی ہیں۔ اب دقت یہ پیش آ رہی ہے کہ رویندر جڈیجہ کے والد یعنی ریوابا جڈیجہ کے سسر ہی ان کے خلاف ووٹ مانگتے ہوئے دکھائی دے رہے ہیں۔
قومی آواز ڈاٹ کام کے مطابق معاملہ کچھ یوں ہے کہ رویندر جڈیجہ کے والد انیرودھ سنگھ جڈیجہ کی ایک ویڈیو سامنے آئی ہے۔ اس میں وہ گجرات کی جام نگر شمال سیٹ سے کانگریس امیدوار کے لیے ووٹ مانگتے نظر آ رہے ہیں۔ انیرودھ سنگھ جڈیجہ کی یہ اپیل سبھی کے لیے حیرت انگیز ہے۔ یہ دیکھ کر بی جے پی کارکنان فکر میں مبتلا دکھائی دے رہے ہیں کہ آخر ریوابا جڈیجہ کے سسر اس کے خلاف ہی کیوں تشہیر کر رہے ہیں۔

गुजरात में रविंद्र जडेजा के पिता ने अपनी भाजपा प्रत्याशी बहू के खिलाफ फिल्डिंग टाइट कर दी है!

उन्होंने लोगों से कांग्रेस उम्मीदवार को जिताने की अपील की है। pic.twitter.com/4VyAiYnKwI

— Indian Youth Congress (@IYC) November 29, 2022

انیرودھ سنگھ جڈیجہ کی ویڈیو یوتھ کانگریس کے ذریعہ سوشل میڈیا پلیٹ فارم ٹوئٹر پر شیئر کی گئی ہے۔ اس ویڈیو کے ساتھ لکھا گیا ہے ’’گجرات میں رویندر جڈیجہ کے والد نے اپنی بی جے پی امیدوار بہو کے خلاف فیلڈنگ ٹائٹ کر دی ہے! انھوں نے لوگوں سے کانگریس امیدوار کو کامیاب بنانے کی اپیل کی ہے۔‘‘ ویڈیو میں انیرود جڈیجہ اپیل کرتے ہوئے سنے جا سکتے ہیں کہ ’’میں انیرودھ سنگھ جڈیجہ کانگریس امیدوار بھوپیندر سنگھ جڈیجہ کو ووٹ دینے کی اپیل کر رہا ہوں۔ وہ میرے چھوٹے بھائی کی طرح ہیں۔ میں خصوصی طور سے راجپوت ووٹروں سے بھوپیندر سنگھ کو ووٹ دینے کی اپیل کرتا ہوں۔‘‘
قابل ذکر ہے کہ کرکٹر رویندر سنگھ جڈیجہ جام نگر شہر میں اپنی بیوی کے لیے انتخابی تشہیر میں مصروف ہیں اور وہ جام نگر اور دیوبھومی دوارکا ضلع میں بھی بی جے پی امیدواروں کے لیے تشہیر کر رہے ہیں۔ کہا جا رہا ہے کہ اسی سیٹ پر رویندر جڈیجہ کی بہن نینابا جڈیجہ جارحانہ طریقے سے کانگریس امیدوار کے لیے انتخابی تشہیر کر رہی ہیں اور اپنی بھابھی پر حملے کرنے سے بھی نہیں جھجک رہی ہیں۔