بہار میں امن و امان ختم، صدر راج لگانے کی ضرورت: چراغ

پٹنہ، 17 نومبر ( یواین آئی ) لوک جن شکتی پارٹی (ایل جے پی-رام ولاس) کے قومی صدر اور جموئی سے ممبر پارلیمنٹ چراغ پاسوان نے آج کہا کہ بہار میں لاءاینڈ آرڈر تباہ ہو گیا ہے اور ریاست میں انارکی کی صورتحال پیدا ہو گئی ہے اور ایسے میں صدر راج نافذ کر دیئے جانے کی ضرورت ہے۔
مسٹر پاسوان نے جمعہ کو یہاں پارٹی ہیڈکوارٹر میں منعقدہ ایک پریس کانفرنس میں کہا کہ بہار میں امن و امان کی صورتحال خراب ہو گئی ہے اور ریاست میں انارکی کی صورتحال پیدا ہو گئی ہے۔ ایسے میں ریاست میں صدر راج نافذ کرنے کی ضرورت ہے۔ انہوں نے کہا کہ حکومت ہر محاذ پر ناکام ہو چکی ہے۔
رکن اسمبلی نے کہا کہ ریت مافیا، شراب مافیا اور لینڈ مافیا کا حکومت پر غلبہ ہے۔ جس کی وجہ سے پولیس جس پر سب کو تحفظ فراہم کرنے کی ذمہ دار ہے، یکم جنوری 2022 سے 30 اگست 2023 تک 1488 مرتبہ مافیا کے حملے کا نشانہ بنی۔ انہوں نے کہا کہ اس حملے میں اب تک 51 پولیس افسران اور اہلکار ہلاک ہو چکے ہیں۔
مسٹر پاسوان نے کہا کہ بہار میں دلتوں کی کیا حالت ہے، بہار اسمبلی میں وزیر اعلیٰ نتیش کمار نے جس طرح مہادلت برادری سے تعلق رکھنے والے سابق وزیر اعلیٰ جیتن رام مانجھی کی توہین کی اور ہراساں کیا، اس سے آسانی سے اندازہ ہو جاتا ہے کہ گاﺅں میں دلتوں کی حالت کیا ہے۔ دلت برادری پر مظالم کے واقعات میں مسلسل اضافہ ہورہا ہے۔ ایسے واقعات میں 67 فیصد اضافہ ہوا ہے۔
ایل جے پی-رام ولاس صدر نے کہا کہ جس طریقے سے وزیر اعلیٰ مسٹر کمار نے ان کے خاندان اور ان کی پارٹی کو کئی بار توڑا ہے۔ یہاں تک کہ ہمارے لیڈر پدم بھوشن رام ولاس پاسوان کی بھی توہین کی گئی، یہ ان کے لیے شرم کی بات ہے۔ انہوں نے وزیر اعظم نریندر مودی سے اظہار تشکر کیا کہ انہوں نے تلنگانہ سے ملک کے عوام کو پدم بھوشن رام ولاس پاسوان کے حوالے سے جو پیغام دیا اور بہار میں دلتوں پر مظالم کی جانکاری دی وہ تاریخی ہے۔