مودی کی نگاہ میں نتیش "لاڈلا وزیر اعلیٰ”

بھاگلپور: وزیر اعظم نریندر مودی نےبھاگلپور میں اپنا خطاب شروع کیا تو نتیش کمار اور ان کی پارٹی کا چہرہ چمک اٹھا۔ اپنی تقریر میں پی ایم نے نتیش کمار کو ‘لاڈلا وزیر اعلی’ کہہ کر مخاطب کیا ۔اس سے قبل وزیر اعظم نریندر مودی وزیر اعلیٰ نتیش کمار کے ساتھ پھولوں سے سجی کھلی گاڑی پر سوار ہو کر اپنے پروگرام کے مقام پر پہنچے۔ مودی اپنے خصوصی طیارے سے پورنیا پہنچے اور وہاں سے ہیلی کاپٹر کے ذریعے تقریباً 90 کلومیٹر دور بھاگلپور کے لیے روانہ ہوئے۔ بھاگلپور پہنچنے پر نتیش کمار اور دیگر معززین نے ان کا استقبال کیا۔اس موقع پر وزیراعظم نے ہاتھ ہلا کر وہاں موجود ہجوم کی جانب سے ان کے لیے لگائے جانے والے نعروں اور مبارکبادوں کا جواب دیا۔ وزیر اعظم بہار کے وزیر اعلی نتیش کمار کے ساتھ کھلی جیپ میں پنڈال پہنچے۔ پی ایم مودی کی ریلی کو لے کر لوگوں میں کافی جوش ہے۔ پروگرام میں شرکت کے لیے ہزاروں لوگ پہنچ چکے ہیں۔
وزیر اعظم نریندر مودی نے کسی کا نام لیے بغیر آر جے ڈی کو نشانہ بنایا جو اپوزیشن اتحاد کی قیادت کر رہی ہے۔ وزیر اعظم نے کہا کہ فی الحال پریاگ راج میں اتحاد کا مہاکمبھ چل رہا ہے۔ یہ ہندوستان کے عقیدے، ہندوستان کے اتحاد اور ہم آہنگی کا سب سے بڑا تہوار ہے۔ اتحاد کے اس کمبھ میں یورپ کی پوری آبادی سے زیادہ لوگ نہا چکے ہیں لیکن یہ جنگل راج کے لوگ اس مہا کمبھ کو گالی دے رہے ہیں۔پی ایم مودی نے کہا کہ رام مندر سے ناراض لوگ مہا کمبھ کو کوسنے کا کوئی موقع نہیں چھوڑ رہے ہیں۔ میں جانتا ہوں، مہا کمبھ کے ساتھ زیادتی کرنے والوں کو بہار کبھی معاف نہیں کرے گا۔ خیال رہے کہ کچھ دن پہلے آر جے ڈی سربراہ اور بہار کے سابق وزیر اعلیٰ لالو پرساد یادو نے مہا کمبھ کو بیکار قرار دیا تھا۔مودی نے کہاکہ حکومت کی کوششوں سے پچھلے کچھ سالوں میں ہندوستان کی زرعی برآمدات میں نمایاں اضافہ ہوا ہے۔ جس کی وجہ سے کسانوں کو اپنی پیداوار کی زیادہ قیمت ملنا شروع ہو گئی ہے۔ بہت سی ایسی زرعی مصنوعات ہیں جن کی برآمد پہلی بار شروع ہوئی۔ اب بہار سے مکھانے کی باری ہے۔ یہ ایک سپر فوڈ ہے جسے اب عالمی منڈیوں میں دستیاب کرنے کی ضرورت ہے۔ اس لیے اس سال کے بجٹ میں مکھانہ پیدا کرنے والے کسانوں کے لیے مکھانہ بورڈ بنانے کا اعلان کیا گیا ہے۔
نتیش کمار نے اپنے خطاب میں بہار اسمبلی انتخابات کا نام لیے بغیر ایک بار پھر عوام سے حمایت مانگی اور کہا کہ پچھلی بار کی طرح اس بار بھی کریں۔ تب ہی بہار مزید ترقی کرے گا۔ ہم نے کتنی ترقی کی ہے؟
پی ایم نے نتیش کو ‘لاڈلا’ کہا: نتیش کمار کو امید تھی کہ وزیر اعظم بھی انتخابات کے بارے میں کچھ کہیں گے، لیکن ایسا نہیں ہوا۔ وزیر اعظم نے آئندہ اسمبلی انتخابات کے بارے میں اشارے میں بھی کچھ نہیں کہا۔ حالانکہ پی ایم مودی نے بھاگلپور میں اسٹیج سے اپنے خطاب کے دوران اسٹیج پر موجود لیڈروں کا نام لینا شروع کیا اور نتیش کمار کو ہمارا محبوب وزیر اعلیٰ کہا، لیکن جنتا دل یونائیٹڈ کی امیدیں ادھوری ہی رہیں۔