نئی دہلی(یو این آئی) وزیر اعظم نریندر مودی 2 سے 9 جولائی تک پانچ ممالک گھانا، ٹرینیڈاڈ اور ٹوباگو، ارجنٹینا، برازیل اور نامیبیا کے آٹھ روزہ دورے پر جائیں گے ۔یہ وزیر اعظم کا گھانا کا پہلا دو طرفہ دورہ ہوگا۔ وہ برازیل میں 17ویں برکس سربراہی اجلاس میں بھی شرکت کریں گے ۔ہندوستانی وزیر اعظم تین دہائیوں کے بعد گھانا کا دورہ کر رہے ہیں۔ دورہ کے دوران مسٹر مودی گھانا کے صدر کے ساتھ مضبوط دو طرفہ شراکت داری کا جائزہ لیں گے اور شراکت داری کے ذریعے اقتصادی، توانائی، دفاع اور ترقیاتی تعاون کو بڑھانے کے مزید مواقع پر تبادلہ خیال کریں گے ۔ یہ دورہ دوطرفہ تعلقات کو مضبوط بنانے اور ‘مغربی افریقی ریاستوں کی اقتصادی برادری’ اور افریقی یونین کے ساتھ ہندوستان کی شراکت داری کو مضبوط بنانے کے لیے دونوں ممالک کے مشترکہ عزم کا اعادہ کرے گا۔
دورہ کے دوسرے مرحلے میں 3 سے 4 جولائی تک ریپبلک آف ٹرینیڈاڈ اینڈ ٹوباگو کے وزیراعظم کی دعوت پر جائیں گے ۔ بطور وزیر اعظم ان کا اس ملک کا یہ پہلا دورہ ہوگا۔ دورے کے دوران وزیر اعظم ٹرینیڈاڈ اور ٹوباگو کی صدر کرسٹین کارلا کنگالو اور وزیر اعظم محترمہ کملا پرساد-بیسسر سے بات چیت کریں گے ۔ وہ ہندوستان-ٹرینیڈاڈ اور ٹوباگو تعلقات کو مزید مستحکم کرنے کے طریقوں پر تبادلہ خیال کریں گے ۔ وزیر اعظم وہاں پارلیمنٹ کے مشترکہ اجلاس سے بھی خطاب کریں گے ۔
دورہ کے تیسرے مرحلے میں مسٹر مودی ارجنٹینا کے صدر کی دعوت پر 4-5 جولائی تک ارجنٹائن کے سرکاری دورے پر رہیں گے ۔ مسٹر مودی تعاون کا جائزہ لینے اور دفاع، زراعت، کان کنی، تیل اور گیس، قابل تجدید توانائی، تجارت اور سرمایہ کاری اور عوام کے درمیان تعلقات سمیت اہم شعبوں میں ہندوستان-ارجنٹینا کی شراکت داری کو مزید بڑھانے کے طریقوں پر تبادلہ خیال کرنے کے لیے صدر مائیلی کے ساتھ دو طرفہ بات چیت کی جائے گی۔
دورہ کے چوتھے مرحلے میں وزیراعظم 17ویں برکس سربراہی اجلاس میں شرکت کے لیے برازیل کے صدر عزت مآب لوئیز اناسیو لولا دا سلوا کی دعوت پر 5 سے 8 جولائی تک برازیل کا دورہ کریں گے ۔ یہ وزیراعظم کا برازیل کا چوتھا دورہ ہوگا۔ برکس رہنما¶ں کا سربراہی اجلاس ریو ڈی جنیرو میں منعقد ہوگا۔ سربراہی اجلاس کے دوران وزیراعظم عالمی گورننس میں اصلاحات، امن و سلامتی، کثیرالجہتی کو مضبوط بنانے ، مصنوعی ذہانت کے ذمہ دارانہ استعمال، موسمیاتی کارروائی، عالمی صحت، اقتصادی اور مالیاتی امور سمیت اہم عالمی امور پر تبادلہ خیال کریں گے ۔ سمٹ کے دوران وزیراعظم کی کئی دو طرفہ ملاقاتیں بھی متوقع ہیں۔ وزیر اعظم برازیل کے سرکاری دورے کے لیے برازیلیا جائیں گے جہاں وہ صدر لولا کے ساتھ باہمی دلچسپی کے شعبوں بشمول تجارت، دفاع، توانائی، خلائی، ٹیکنالوجی، زراعت، صحت اور عوام سے عوام کے رابطوں کے شعبوں میں اسٹریٹجک شراکت داری کو وسعت دینے پر دو طرفہ بات چیت کریں گے ۔
دورہ کے آخری مرحلے میں مسٹر مودی 09 جولائی کو نامیبیا کے صدر ڈاکٹر نیتمبو نندی-ندیتواہ کی دعوت پر نامیبیا کا سرکاری دورہ کریں گے ۔ یہ وزیر اعظم کا نامیبیا کا پہلا دورہ ہوگا اور ہندوستان سے نامیبیا کا اب تک کا تیسرا وزیر اعظم دورہ ہوگا۔ مسٹر مودی صدر نندی نداتواہ کے ساتھ دو طرفہ بات چیت کریں گے ۔ وزیراعظم نامیبیا کے بانی اور پہلے صدر ڈاکٹر سام نوجوما کو بھی خراج عقیدت پیش کریں گے ۔ امید ہے کہ وہ نامیبیا کی پارلیمنٹ میں تقریر بھی کریں گے ۔
