ممبئی /تھانے (یواین آئی) ممبئی کے دورافتادہ کلیان سول کورٹ نے48 سال پرانی قانونی لڑائی پر فیصلہ دیتے ہوئے متنازعہ درگاڑی قلعہ مہاراشٹر حکومت کی ملکیت قراردیا ہے اور مسلم فریق کے دعووں کو مسترد کر دیا ہے۔اس فیصلے کے فوراً بعدمسلم فریق نے کہا ہے کہ وہ اس فیصلے کو بمبئی ہائی کورٹ میں چیلنج کریں گے۔
کلیان کورٹ کے سینئر ڈیویژن سول جج اے ایس لنجوار نے کہا کہ مسلم فریق کا دعویٰ وقتی تھا اور اس نے پہاڑی قلعے پر ریاستی حکومت کے دعوے کو بھی درست قرار دیا۔1976 میں دعویٰ دائر کرتے ہوئے، مسلم فریق نے دعویٰ کیا تھا کہ درگاڈی قلعہ کے اندر ایک مسجداور ایک عیدگاہ ہے ۔ جس میں دیوی درگا کا مندر بھی ہے۔یہ تنازعہ 1966 میں تھانے کے ضلع کلکٹر کی رپورٹ کے بعد پیدا ہوا جس میں قلعے کے اندر ایک ہندو مندر کی موجودگی کا اشارہ دیا گیا تھا، یہاں تک کہ تاریخی یادگار امسال سے ریاستی حکومت کے زیر انتظام تھا۔
وکیل سچن کلکرنی نے کہاکہ گزشتہ پانچ دہائیوں میں، درگاڑی قلعہ مسلمانوں اور ہندوؤں کے لیے اپنی تاریخی، ثقافتی اور مذہبی اہمیت کی وجہ سے تنازعہ کی وجہ بن گیا، لیکن عدالت نے گزشتہ 58 سال سے اس معاملے میں جمود برقرار رکھا ہوا تھا۔
30 سال پہلے (1994)، عدالت نے ریاستی پی ڈبلیو ڈی کو دو گڑھوں کے ساتھ قلعہ کی کچھ فوری مرمت کے کام کرنے کی اجازت دی تھی، اس بنیاد پر کہ یہ ریاستی حکومت کا ہے جس نے اسے اپنے قبضے میں لے لیا تھا لیکن بعد میں اسے کلیان میونسپل کے حوالے کر دیا تھا۔ اس کی دیکھ بھال کے لیے کارپوریشن ہی کرتی تھی۔تاہم، چونکہ کے ایم سی تعمیل کرنے میں ناکام رہی، ریاستی حکومت نے اسے دوبارہ سنبھال لیا، اور اب وہاں کسی بھی قسم کی سرگرمیوں، پروگراموں، تقریبات وغیرہ کے انعقاد کے لیے ریاستی حکومت کی پیشگی اجازت لازمی ہے۔
کلکرنی نے بتایا کہ جج نے مناسب جواز کے بغیر غیر معقول تاخیر کو بھی کیس کو خارج کرنے کی وجہ سمجھا اور عدالت نے معاملہ ریاستی وقف بورڈ کو منتقل کرنے کی ٹرسٹ کی درخواست کو بھی مسترد کردیا۔کلیان زون سوم کے ڈپٹی کمشنر آف پولیس اتل زینڈے نے کہا کہ عدالتی حکم کے بعد سخت جذبات کے پیش نظر پولیس نے قصبہ اور درگاڈی قلعہ میں سیکورٹی بڑھا دی ہے۔
ہندو منچ کے صدر، جو کہ عرضی گزار بھی ہیں، دنیش دیشمکھ نے کہا کہ کلیان کورٹ نے مسلم فریق کے تمام دعووں کو مسترد کر دیا ہے، جس میں اسے سماعت کے لیے وقف بورڈ کو منتقل کرنا بھی شامل ہے۔
حکمراں مہا یوتی اتحادی شیو سینا کلیان کے سربراہ روی پاٹل نے کہا کہ درگاڈی قلعہ کی شاندار تاریخ ہے اور اس کا دورہ چھترپتی شیواجی مہاراج نے 1656 میں نظام حکمرانوں کے دور میں کیا اور بعد میں اس پر قبضہ کر لیا۔اس کے بعد 1971 میں ہندو دل سمراٹ آنجہانی بال ٹھاکرے وہاں گئے تھے اور اس پر مسلم کمیونٹی کے دعووں کو جھنجھوڑ کر رکھ دیا تھا۔ پاٹل نے دعویٰ کیا کہ قلعہ کے اندر کی عیدگاہ محض ایک دیوار ہے، جبکہ وہاں کا مندر بہت پرانا ہے۔درحقیقت، فیصلے کے فوراً بعد شیو سینا، ہندو منچ اور دیگر تنظیموں نے درگاڈی قلعہ کے مندر میں علامتی ’آرتی‘ کی۔اقلیتی فرقے میں ناراضگی پائی جاتی ہے۔
