لکھنؤ:06جنوری(یواین آئی)اترپردیش کی یوگی حکومت پر کمیشن خوری کا الزام لگاتے ہوئے سماج وادی پارٹی(ایس پی) صدر اکھلیش یادو نے پیر کو کہا کہ بی جے پی حکومت کا نیا تعارف بدعنوانی اور منظم لوٹ ہوگیا ہے۔پارٹی کے ریاستی ہیڈکوارٹر پر اترپردیش سمیت جھارکھنڈ، آندھرا پردیش، مدھیہ پردیش، مہاراشٹرا،راجستھان سے آئے پارٹی لیڈروں اور کارکنان سے خطاب کرتے ہوئے یادو نے کہا کہ بی جے پی حکومت میں بڑے پیمانے پر کمیشن خوری ہورہی ہے۔ بدعنوانی شباب پر ہے۔ ہر سطح پر لوٹ ہے۔ بی جے پی حکومت میں ہر عہدے اور ہر پوزیشن کی ریٹ فکس ہے۔ ہر محکمہ میں بدعنوانی ہورہی ہے۔ ایسا کوئی محکمہ نہیں ہے۔ جہاں لوٹ نہیں ہورہی ہے۔
سبھی لیڈروں، کارکنان کو نئے سال کی مبارک باد دیتے ہوئے انہوں نے کہا کہ 2027 کے اسمبلی الیکشن میں بی جے پی کو اقتدار سے ہٹا کر عوام کے مفاد اور اترپردیش کی ترقی کے لئے سماج وادی پارٹی(ایس پی) کی حکومت بنانا ہی نیک تمناؤں کا نیک شگون ہوگا۔یادو نے کہا کہ بی جے پی حکومت میں بدعنوانی اور لوٹ کی کمائی پر قبضہ کرنے کی لڑائی چل رہی ہے۔ خود بی جے پی ایم ایل اے اور لیڈر بدعنوانی اور لوٹ کا الزام لگارہے ہیں۔ اس حکومت کی بدعنوانی نے کسی کو نہیں چھوڑا ہے۔ خواتین، کاروباری، کسان، نوجوان عوام الناس سب عاجز ہوچکے ہیں۔
