حیدرآباد۔5مئی (یواین آئی)وزیراعلی تلنگانہ ریونت ریڈی نے عہدیداروں کو ہدایت دی ہے کہ مس ورلڈ2025مقابلوں کے کامیابی سے انعقاد کے لئے وسیع تر انتظامات کئے جائیں۔محکمہ پولیس کو چوکس کردیا گیا ہے تاکہ نگرانی میں شدت پیدا کی جاسکے اور حیدرآباد میں 10تا31مئی ہونے والی عالمی درجہ کی رنگارنگ تقاریب کے لئے سخت سیکوریٹی انتظامات کئے جائیں۔ ریونت ریڈی نے زور دیتے ہوئے کہا کہ مس ورلڈ2025کی تقاریب باوقار انداز میں منعقد کی جائیں تاکہ تلنگانہ کی شبیہ پر دنیا بھر کی توجہ ہو۔ اس مقابلہ میں حصہ لینے کے لئے 116ممالک کی حسیناوں کی آمد کے پیش نظر انہوں نے عہدیداروں کو ہدایت دی کہ دنیا بھر کے مہمانوں کی بغیر کسی مشکلات کے بہتر مہمان نوازی کی جائے ۔ مقابلہ میں حصہ لینے والی حسیناوں کے علاوہ ہندوستان اور بیرون ملک کے 300میڈیا نمائندے اس بڑے مقابلہ حسن کا کوریج کرنے کے لئے یہاں پہنچیں گے ۔ انہوں نے عہدیداروں کو تجویز پیش کی کہ مختلف ممالک سے یہاں آنے والے افراد کا تلنگانہ کی ثقافت’ روایات کے ساتھ گرمجوشانہ استقبال کیا جائے اور اس مقابلہ کی تکمیل تک کسی بھی غلطی کے بغیر انتطامات کئے جائیں۔ تمام محکمہ جات بشمول محکمہ سیاحت کو چاہئے کہ تمام عہدیداروں کے ساتھ تال میل کے ساتھ کام کرے تاکہ ان کو تفویض کردہ ذمہ داریاں موثر طور پر انجام دی جاسکیں۔ انہوں نے مس ورلڈ کے انتظامات کے سلسلہ میں پیر کو کمانڈ کنٹرول سنٹر میں اعلی سطحی اجلاس منعقد کیا جس میں وزراءجوپلی کرشناراو’ پی سرینواس ریڈی کے علاوہ ریونت ریڈی کے مشیر نریندر ریڈی’ چیف سکریٹری راماکرشناراو’ اسپیشل چیف سکریٹری جیش رنجن’ ڈی جی پی جتندر’کمشنر پولیس حیدرآباد سی وی آنند’ کمشنر پولیس رچہ کنڈہ سدھیربابو’ اڈیشنل ڈی جی پی اسٹیفن رویندرا اور تمام محکمہ جات کے سینئر عہدیداروں نے شرکت کی۔ ریونت ریڈی نے عہدیداروں کو ہدایت دی کہ پروگرام کے شیڈول کے مطابق سیکوریٹی کے انتظامات کئے جائیں۔ انہوں نے تجویز پیش کی کہ ہر پروگرام کے لئے ایک نوڈل آفیسر بنایا جائے ۔ انہوں نے کہا کہ ہر پروگرام کو کامیاب بنانے کے لئے مس ورلڈ مقابلہ کے گچی باولی انڈور اسٹیڈیم میں آغاز سے لے کر 31مئی کو ہونے والے فائنل مقابلہ تک مناسب بندوبست کیا جائے ۔ انہوں نے کہا کہ مقابلہ میں حصہ لینے کے لئے آنے والی حسیناوں کے لئے مناسب ٹرانسپورٹ اور دیگر سہولتیں فراہم کی جائیں جو چارمینار’ لاڈبازار’ سکریٹریٹ کے تلنگانہ تلی اور ریاست کے دیگر سیاحتی مقامات کا دورہ کریں گی۔ سیکوریٹی انتظامات کے علاوہ وزیراعلی نے عہدیداروں سے خواہش کی کہ ناپسندیدہ اور غیرمتوقع صورتحال سے نکلنے کے لئے متبادل منصوبے تیار کئے جائیں۔ انہوں نے ٹریفک کے مسائل گریز کے لئے احتیاط کرنے پر زور دیا۔انہوں نے مشورہ دیا کہ موسمی پیش قیاسی کے مطابق مناسب طور پر پیشگی انتظامات کئے جائیں۔ بلدیہ اور حیدرا کو چوکس رکھا جائے تاکہ شہر میں طوفانی ہواوں اور بارش کی صورت میں بھی کوئی مسئلہ درپیش نہ ہو۔ پولیس عہدیداروں کو ہدایت دی گئی کہ وہ ان ہوٹلوں میں سیکوریٹی کے سخت انتظامات کرے جہاں پر بیرونی مہمان مقیم ہیں۔ گچی باولی اسٹیڈیم’چارمینار’ لاڈبازار’ چومحلہ پیالیس اور سکریٹریٹ کے اطراف سخت سیکورٹی انتظامات کئے جائیں۔ انہوں نے عہدیداروں کو ہدایت دی کہ حکومت کی طرف سے مس ورلڈ کی افتتاحی تقریب کے لئے مختلف شعبوں کی اہم شخصیتوں کے علاوہ ریاست کے عوامی نمائندوں کو بھی مدعو کیا جائے ۔
