نائب صدر کی نقالی کے واقعہ پرصدراوروزیراعظم کا اظہار افسوس

نئی دہلی(یواین آئی)صدرجمہوریہ دروپدی مرمو نے نائب صدرجمہوریہ وصدرنشین راجیہ سبھا جگدیپ دھنکر کی پارلیمنٹ کے احاطہ میں ایک رکن کی جانب سے نقل اڑائے جانے کے واقعہ پرردعمل ظاہر کرتے ہوئے افسوس کااظہارکیا ہے۔دروپدی مرمو جو سرمائی تعطیلات گذارنے کیلئے حیدرآباد کے راشٹرپتی نیلائم میں مقیم ہیں نے اس واقعہ پر ٹوئیٹ کیا۔انہوں نے انگریزی میں کئے گئے ٹوئیٹ میں کہا”پارلیمنٹ کے احاطہ میں جس طرح ہمارے معزز نائب صدر کی تذلیل کی گئی اسے دیکھ کر مایوسی ہوئی۔ منتخب نمائندوں کو اپنے اظہار کی آزادی ہونی چاہیے تاہم ان کا اظہار وقار اور شائستگی کے اصولوں کے اندر ہونا چاہیے۔ یہی پارلیمانی روایت رہی ہے۔ ہمیں اس پر فخر ہے اور ہندوستان کے عوام ان سے توقع رکھتے ہیں کہ وہ اسے برقرار رکھیں گے۔“
ادھر نئی دہلی وزیر اعظم نریندر مودی نے نائب صدر جمہوریہ کے عہدہ کا مذاق اڑانے پر گہرے دکھ کا اظہار کیا ہے اور کہا ہے کہ پارلیمنٹ کے احاطے میں اس طرح کا واقعہ ہونا افسوس کی بات ہے۔نائب صدرجمہوریہ اور راجیہ سبھا کے چیئرمین جگدیپ دھنکھڑ نے بدھ کو سماجی رابطے کی ویب سائٹ ایکس پر پوسٹ کیے گئے ایک پیغام میں کہا کہ وزیر اعظم نے انہیں فون کیا ہے اور کچھ ممبران پارلیمنٹ نے ان کا مذاق اڑانے پر گہرے دکھ کا اظہار کیا ہے۔مسٹر دھنکھڑ نے کہا ’’مجھے وزیر اعظم نریندر مودی جی کا فون آیا اور انہوں نے کل پارلیمنٹ کے مقدس احاطے میں کچھ معزز ممبران پارلیمنٹ کی طرف سے دکھائے گئے توہین آمیز ڈرامے پر گہرے دکھ کا اظہار کیا۔انہوں نے مجھے بتایا کہ وہ گزشتہ 20 سال سے اس طرح کی توہین برداشت کر تے آرہے ہیں لیکن ملک کے نائب صدر جیسے آئینی عہدے کے ساتھ اور وہ بھی پارلیمنٹ میں ایسا ہونا افسوس کی بات ہے۔‘‘
اس پر مسٹر دھنکھڑ نے کہا ’’میں نے وزیر اعظم سے کہا کہ کچھ لوگوں کی بے تکی حرکتیں مجھے اپنا فرض ادا کرنے اور ہمارے آئین میں درج اصولوں کا احترام کرنے سے نہیں روک سکتیں۔ میں آئینی اقدار کے تئیں پابند ہوں اور اس طرح کی توہین مجھے اپنے راستے چلنے پر پریشان نہیں کرسکتی۔ ‘‘
واضح ر ہے کہ منگل کو ترنمول کانگریس کے لوک سبھا رکن پارلیمنٹ کلیان بنرجی نے پارلیمنٹ کمپلیکس میں دیگر ممبران پارلیمنٹ کے سامنے راجیہ سبھا کے چیئرمین کی نقل کی، جب کہ دیگر ممبران پارلیمنٹ ان کی ویڈیو بناتے رہے۔