راہل نوین انفورسمنٹ ڈائریکٹوریٹ کے نئے قائم مقام ڈائریکٹرمقرر

نئی دہلی: راہل نوین انفورسمنٹ ڈائریکٹوریٹ کے نئے قائم مقام ڈائریکٹر بنیں گے۔ سپریم کورٹ کے حکم کی وجہ سے سنجے کمار مشرا کو انفورسمنٹ ڈائریکٹوریٹ یعنی ای ڈی کے ڈائریکٹر کے عہدے سے ہٹائے جانے کے بعد حکومت نے راہل نوین کو قائم مقام ڈائریکٹر بنایا ہے۔ بہار کے رہنے والے راہل نوین 1993 بیچ کے انڈین ریونیو سروس کے افسر ہیں۔
ذہن نشیں رہے کہ سپریم کورٹ نے اپنے فیصلے میں سنجے کمار مشرا کو تیسری بار توسیع دینے سے انکار کر دیا تھا۔ انہیں 15 ستمبر تک یہ عہدہ چھوڑنے کا حکم دیا گیا تھا۔ وہ 2018 سے اس عہدہ پرفائز تھے۔سرکاری حکم نامے میں جمعہ کو کہا گیا کہ آئی آر ایس افسر راہل نوین کو انفورسمنٹ ڈائریکٹوریٹ کا ڈائریکٹر انچارج مقرر کیا گیا ہے۔ راہل نوین 1993 بیچ کے آئی آر ایس افسر ہیں۔ اسپیشل ڈائریکٹر ہونے کے علاوہ راہل نوین، جو بہار سے تعلق رکھتے ہیں، ای ڈی ہیڈکوارٹر کے چیف ویجیلنس آفیسر کے طور پر بھی کام کر رہے ہیں۔ ذرائع کے مطابق وہ نئے ڈائریکٹر کی باقاعدہ تقرری تک قائم مقام ڈائریکٹر کی ذمہ داریاں نبھائیں گے۔
سنجے کمار مشرا کو 2018 میں ای ڈی کا ڈائریکٹر مقرر کیا گیا تھا۔ ان کا دور نومبر 2020 میں ختم ہونا تھا مگرمرکز کی طرف سے انہیں تین بار سروس میں توسیع دی گئی۔ اس اقدام کو اپوزیشن کی جانب سے تنقید کا نشانہ بنایا گیا اور اس فیصلے کو سپریم کورٹ میں چیلنج کیا گیا۔ سنجے کمار مشرا کی میعاد کو بڑھانے کے لیے سی وی سی ایکٹ میں بھی ترمیم کی گئی۔ گزشتہ جولائی کے مہینے میں سپریم کورٹ نے سنجے کمار مشرا کی تیسری توسیع کو غیر قانونی قرار دیا تھا۔ جس کا شیڈول 18 نومبر 2023 تک تھا۔
عدالت نے یہ بھی کہا تھا کہ انہیں 31 جولائی تک اپنا عہدہ چھوڑنا ہوگا۔ تاہم، مرکزی حکومت نے تب سپریم کورٹ سے درخواست کی تھی کہ انہیں 15 اکتوبر تک اس عہدے پر برقرار رہنے کی اجازت دی جائے۔ جس پر عدالت نے انہیں 15 ستمبر تک عہدے پر رہنے کی اجازت دے دی تھی۔