موتیہاری پولی ٹیکنک کالج کا سالانہ تقریب "اڑان-2023” کا انعقاد
موتیہاری۔ سے عقیل مشتاق کی رپورٹ
پولی ٹیکنک کالج موتیہاری کے سالانہ تقریب "اڑان – 2023” کا انعقاد پیر کی شام کالج کیمپس میں ہوا۔ پروگرام کا افتتاح حکومت بہار کے وزیر قانون ڈاکٹر شمیم احمد نے شمع روشن کر کیا۔ موقع پر موجود طلباء سے خطاب کرتے ہوئے ڈاکٹر احمد نے کہا کہ طلباء کسی بھی معاشرے، ریاست اور قوم کا اصل سرمایہ ہوتے ہیں۔ ملک و ملت کی ترقی میں ان کا کردار اہم ہے۔ ایسے میں طلبہ میں خود اعتمادی بہت ضروری ہے۔ کیونکہ اعتماد کی بدولت ہی کامیابی کی معراج تک پہنچنا ممکن ہے۔ دوسری طرف کلیان پور کے ایم ایل اے کم آر جے ڈی ضلع صدر منوج یادو نے مخصوص بھوجپوریہ انداز میں طلبہ سے خطاب کرتے ہوئے کہا کہ ایک کامیاب پیشہ ور بننے کے لیے منفی خیالات کو ترک کرنا ضروری ہے۔ سگولی کے ایم ایل اے ای ششی بھوشن سنگھ نے طلبہ کی حوصلہ افزائی کرتے ہوئے کہا کہ وہ خود پولی ٹیکنک کے طالب علم رہے ہیں۔ پولی ٹیکنک میں مواقع کی کوئی کمی نہیں ہے۔ اس موقع پر وزیر قانون نے ریاستی سطح پر منعقد ہیکاتھون میں بہتر کارکردگی کے طلبہ کو مومنٹو اور توصیف نامہ سے نوازا نیز سالگرہ کے موقع پر منعقد ہونے والے کرکٹ، والی بال، کبڈی، سلو سائیکل ریس، کوئز، پینٹنگ اور خاکہ نگاری کے مقابلوں میں کامیاب شرکاء کو انعامات سے بھی نوازا۔ افتتاحی سیشن کے بعد کالج کے طلباء نے ثقافتی پروگرام کے دوران ایک سے بڑھ کر ایک رقص موسیقی پیش کر کے پروگرام کو بلندیوں سے ہمکنارکیا۔ موقع پرموتیہاری انجینئرنگ کالج کے پرنسپل ڈاکٹر ابھے کمار جھا، گورنمنٹ پولی ٹیکنیک کالج مظفر پور کے پرنسپل ڈاکٹر ورون کمار اور الیکٹرانکس ڈیپارٹمنٹ کے صدر ڈاکٹرمحمد سنور عالم، ڈاکٹر اسمرتی رتن، ڈاکٹر محمد۔ ابوالکلام آزاد، پروفیسر رانا رندھیر پرتاپ، پروفیسر جینت راج، پروفیسر گووند شاہ، ڈاکٹر پریم ودا، پروفیسر۔ نوین کمار، پروفیسرستیہ دیو کمار رام، سینئر انسٹرکٹر اشوک کمار گورو وغیرہ موجود تھے۔ پروگرام کی صدارت انجینئرنگ کالج کے پرنسپل اور آئے ہوئے مہمانوں کا استقبال کالج کے پرنسپل ڈاکٹر فضل سرور نے کیا۔
