آنکھ میں شدید تکلیف، ترنمول کی میٹنگ میں ابھیشیک بنرجی کی عدم شرکت

کلکتہ 23نومبر (یواین آئی) پارٹی کے آل انڈیا جنرل سکریٹری ابھیشیک بنرجی آنکھ کی نئی پریشانی کی وجہ سے جمعرات کو نیتا جی انڈور اسٹیڈیم میں منعقد ہونے والی میٹنگ میں شرکت نہیں کی ۔تاہم انہوں نے ورچوئل میٹنگ میں شرکت کی۔ ڈاکٹروں کے مشورے کی وجہ سے انہوں نے اپنے خیالات کا اظہار نہیں کیا ۔
ترنمول کانگریس کے ریاستی صدر سبرتو بخشی نے جمعرات کو نیتا جی انڈور میٹنگ میں کہاکہ ’’ابھیشیک بنرجی ڈاکٹروں کے مشورے پر آرام کر رہے ہیں۔ وہ آنکھوں کی تکلیف کی وجہ سے اس میٹنگ میں شرکت سے قاصر ہیں۔ ابھیشیک بنرجی ہی میٹنگ کا افتتاح کرنے والے تھے ۔تاہم بیماری کے باوجود وہ کارکنان کی محبت اور احترام میں میٹنگ میں ورچوئل شریک ہیں ۔بخشی نے کہاکہ ابھیشیک کو ڈاکٹروں نے 10دنوں تک آرام کرنے کا مشورہ دیا ہے ۔انہیں زیادہ بولنے سے بھی منع کیا گیا ہے۔
ترنمول کانگریس کے ذرائع کے مطابق ممتا بنرجی نیتا جی کی اندور اسٹڈیم میں منعقد ہونے والی میٹنگ میں آئندہ لوک سبھا انتخابات سے قبل مرکزی حکومت کے ذریعہ ریاست کو محروم کئے جانے تحریک کا خاکہ پیش کرسکتی ہیں ۔اس سے قبل یہ میٹنگ 16 نومبر کو نیتا جی اندور میں ہونے والی تھی۔ لیکن اسی دن ایڈن گارڈنز میں ورلڈ کپ کرکٹ سیمی فائنل کو ایڈجسٹ کرنے کے لیے اسے ملتوی کر دیا گیا۔ اب یہ میٹنگ جمعرات، 23 تاریخ کو، عالمی بنگال تجارتی کانفرنس کے اختتام کے ایک دن بعد منعقد ہورہی ہے۔ میٹنگ میں ترنمول کانگریس کے بلاک لیول سے لے کر ریاستی سطح کے لیڈروں کو مدعو کیا گیا ہے۔
بدھ کو عالمی بنگال تجارتی کانفرنس ختم ہونے کے بعد ممتا نے ابھیشیک سے ان کے گھر پر ملاقات کی۔ ترنمول کانگریس کے ایک ذریعہ نے بتایا کہ ابھیشیک کی آنکھوں میں کانٹیکٹ لینس زیادہ پہننے کی وجہ سے خون جم گئے ہیں ۔انہوں نے شہر ایک اسپتال میں آنکھوں کا تین گھنٹے تک علاج کرایا ہے۔ترنمول ذرائع کے مطابق ڈاکٹروں نے ابھیشیک سے کہا ہے کہ انہیں اب گھر پر آرام کرنے کی ضرورت ہے۔
2016 میں ابھیشیک بنرجی کی کار مرشد آباد میں پارٹی کے ایک پروگرام سے واپس آتے ہوئے سنگور کے درگاپور ایکسپریس وے پر دودھ کے ٹرک سے ٹکرا گئی تھی۔ ابھیشیک کی بائیں آنکھ پر شدید چوٹ آئی ہے۔ اس کے بعد سے ان کی بائیں آنکھ کی کئی سرجری ہوچکی ہے ۔ مسلسل علاج جاری ہے۔ ابھیشیک 20 اگست کو امریکہ سے آنکھوں کا علاج کرانے کے بعد کلکتہ واپس آئے ہیں۔
اکتوبر میں ابھیشیک بنرجی کی قیادت میں ترنمول کانگریس نے پہلے دہلی میں اور اس کے بعد کلکتہ میں مرکزی حکومت کے خلاف تحریک چلائی تھی ۔گورنر ہائوس کے باہر کئی دنوں تک دھرنا دیا گیا تھا۔ ابھیشیک نے ممتا کے مشورے پر دھرنا ختم کر دیا کیونکہ گورنر سی وی آنند بوس نے ترنمول کے وفد سے ملنے پر رضامندی ظاہر کی تھی۔ لیکن ساتھ ہی انہوں نے کہا تھا کہ اگر مرکز 31 اکتوبر تک واجبات ادا نہیں کرتا ہے تو ترنمول کانگریس یکم نومبر سے سڑکوں پر اترے گی۔ اور ممتا اس تحریک کا چہرہ ہوں گی۔
تاہم درگا پوجا اور دیگر تہواروں کی وجہ سے یکم نومبر کو تحریک شروع نہیں ہوسکی تھی۔اب ترنمول کانگریس آج میٹنگ کے ذریعے مرکزی کے خلاف تحریککا اعلان کریں گی۔