شیوانند تیواری کو ہتک عزت کے معاملے میں ایک سال قیدکی سزا

پٹنہ (یو این آئی) بہار میں اراکین پارلیمنٹ اور اراکین اسمبلی کے مجرمانہ مقدمات کی سماعت کے لیے قائم پٹنہ کی ایک خصوصی عدالت نے آج راشٹریہ جنتا دل (آر جے ڈی) کے سینئر لیڈر شیوانند تیواری کو ہتک عزت کے ایک معاملے میں ایک سال قید اور 10 ہزار روپے جرمانے کی سزا سنائی ہے ۔
خصوصی جج ساریکا بہالیہ نے معاملے کی سماعت کے بعدتعزیرات ہند کی دفعہ 500 کے تحت مسٹر تیواری کو مجرم قرار دینے کے بعد یہ سزا سنائی ہے۔ جرمانے کی رقم ادا نہ کرنے کی صورت میں مسٹر تیواری کو تین ماہ کے قید کی سزا الگ سے بھگتنی ہوگی۔ فیصلہ سنائے جانے کے بعد مسٹر تیواری کے وکیل سدھیر کمار سنہا نے ایک عرضی دے کر ضمانت پر رہائی کی درخواست کی۔ درخواست کو قبول کرتے ہوئے عدالت نے مسٹر تیواری کو اپیل دائر کرنے کے لیے ضمانت پر رہا کردیا۔
معاملہ 2018 کا ہے۔ جنتا دل یونائیٹڈ (جے ڈی یو) کے قومی جنرل سکریٹری سنجے کمار جھا کی جانب سے انڈین پینل کوڈ کی دفعہ 499 اور 500 کے تحت ایک شکایتی مقدمہ نمبر 3959 سی 2018 چیف جوڈیشل مجسٹریٹ، پٹنہ کی عدالت میں دائر کیا گیا تھا۔
شکایت نامہ کے مطابق، شکایت کنندہ مسٹر جھا نے 07 اگست 2018 کو ایک پریس کانفرنس میں مسٹر تیواری کے دیے گئے مبینہ بیان کو ہتک آمیز قرار دیا تھا، جس میں مسٹر تیواری نے وزیر اعلیٰ نتیش کمار اورمسٹر جھا کے درمیان تعلقات کو لے کر مبینہ طور پر قابل اعتراض بیان دیا تھا۔اور کہا تھا کہ مسٹر نتیش کمار گیسٹ ہاو ¿س میں رہنے کے بجائے سنجے جھا کے گھر کیوں ٹھہرتے ہیں۔ استغاثہ کی جانب سے الزامات ثابت کرنے کے لیے عدالت میں مسٹر جھا سمیت سات گواہوں کے بیانات قلمبند کرائے گئے تھے جبکہ مسٹر تیواری کی جانب سے دفاع میں ایک گواہ پیش کیا گیا۔
یواین آئی۔۔ قمر