نیہا سنگھ راٹھورمشکل میں گھِر گئیں

ذہن نشیں رہے کہ نیہا سنگھ راٹھور نے پچھلے ہفتے ہی اپنی بھوجپوری گیت ‘یوپی میں کا با’ کے عنوان سے ایک ویڈیو جاری کیا تھا، جو بہت جلد وائرل ہو گیا۔ اس گیت میں 45 سالہ پرمیلا دکشت اور ان کی 20 سالہ بیٹی کی ان کی جھونپڑی میں انہدامی کارروائی کے دوران زندہ جل کر ہونے والی دردناک موت کے واقعے کو بیان کیا گیا ہے اور یوگی حکومت پر طنز بھی کیا گیا ہے۔
خبروں کے مطابق اترپردیش پولیس نے کل رات نیہا کے گھر جاکر انہیں ایک نوٹس دیا جس میں ان پر سماج میں "دشمنی اور کشیدگی کی صورت پیدا کرنے” کا الزام لگایا گیا ہے۔ نوٹس میں ان سے ڈھیر سارے سوالات بھی پوچھے گئے ہیں اور تین دن کے اندر ان کا جواب دینے کا حکم دیا گیا ہے۔
نیہا سنگھ راٹھور سے ان کے سوشل میڈیا چینل کے حوالے سے بھی کئی سوالات پوچھے گئے ہیں۔ مثلاً ان سے پوچھا گیا ہے کہ کیا ویڈیو میں جو خاتون دکھائی دے رہی ہیں وہ خود ہیں؟ کیا یہ گیت خود ان کا لکھا ہوا ہے؟ اگر انہوں نے یہ گیت خود نہیں لکھا ہے تو کیا نغمہ نگار نے ان سے اس گیت کو لکھنے کی باضابطہ اجازت لی تھی؟ کیا انہوں نے خود ہی اس کی ویڈیو ریکارڈنگ کی تھی؟ کیا انہوں نے خود ہی اسے یو ٹیوب چینل پر ڈالا تھا؟
نوٹس میں یہ بھی پوچھا گیا ہے کہ کیا وہ اس بات سے آگاہ ہیں کہ اس گیت نے سماج میں دشمنی اور کشیدگی پیدا کر دی ہے؟نوٹس میں مزید کہا گیا ہے، "اگر آپ کا جواب اطمینان بخش نہیں ہوا تو آپ کے خلاف تعزیرات ہند اور مجرمانہ قوانین کے دفعات کے تحت مقدمہ درج کیا جائے گا، تفتیش کی جائے گی اور قانونی کارروائی کی جائے گی۔”
خیال رہے کہ آج کل بھوجپوری گیتوں میں فحاشی کی بھرمار ہوتی ہے، لیکن نیہا سنگھ راٹھور سماجی مسائل مثلاً جہیز، بدعنوانی اور بے روزگاری نیزسیاست کو اپنی گیتوں کا موضوع بناتی ہیں۔ وہ سن 2022میں اترپردیش اسمبلی انتخابات کے دوران "یوپی میں کابا” سریز کے اپنے لوک گیتوں کی وجہ سرخیوں میں آئی تھیں۔ اس سے قبل سن 2020 میں ان کی "بہار میں کا با” سریز بھی کافی مقبول ہوئی تھی۔ کانپور یونیورسٹی سے تعلیم یافتہ نیہا سنگھ راٹھور کے یوٹیوب چینل پر تقریباً نو لاکھ فالوورز ہیں۔ ٹوئٹر اور انسٹا گرام پر بھی ان کے مداحوں کی کافی تعداد ہے۔
گوکہ نیہا سنگھ راٹھور پچھلے برس اترپردیش اسمبلی انتخابات کے دوران ریاستی وزیر اعلیٰ یوگی ادتیہ ناتھ کے خلاف اپنی طنزیہ گیتوں کی وجہ سے زیادہ مقبول ہوئیں لیکن اس سے قبل وہ بہار کے وزیر اعلیٰ نتیش کمار اور سابق وزیر اعلیٰ لالو پرساد یادو کو بھی طنزیہ گیتوں کے ذریعہ نشانہ بنا چکی ہیں۔متعدد رہنماوں نے نیہا سنگھ کے خلاف پولیس کے اقدام کی شدید نکتہ چینی کی ہے۔ ان میں اترپردیش کے سابق وزیر اعلیٰ اکھلیش یادو اور دہلی کے نائب وزیر اعلی منیش سسودیا شامل ہیں۔ سسودیا نے ٹوئٹر پر لکھا "جب مقبول گلوکارہ نیہا سنگھ بے خوف ہوکر سوالات پوچھ رہی ہیں، تو بی جے پی حکومت نے پولیس کے ذریعہ ان کے گھر پر نوٹس بھجوا دیا…کیا بی جے پی ایک لوک گلوکارہ سے اتنی زیادہ خوف زدہ ہے؟ افسوس ناک۔ یہ انتہائی شرمناک ہے۔”
نیہا سنگھ سن 1997میں بہار کے کیمور ضلعے میں پیدا ہوئیں۔ ان کے سوشل میڈیا پروفائل کے مطابق وہ اپنے لوک گیتوں کے ذریعہ بھوجپوری گیتوں کے "وقار کو بحال کرنے کی جنگ” لڑ رہی ہیں۔