راشٹریہ راجپوت کرنی سینا کے صدر کے قتل کیس کی تحقیقات کیلئے ایس آئی ٹی تشکیل

جے پور (یواین آئی) راجستھان کی راجدھانی جے پور میں دن دہاڑے شری راشٹریہ راجپوت کرنی سینا کے صدر سکھدیو سنگھ گوگمیڈی کے قتل کے معاملے کی مکمل جانچ کے لیے ایس آئی ٹی تشکیل دی گئی ہے۔
ڈائرکٹر جنرل آف پولیس امیش مشرا نے آج ایڈیشنل ڈائرکٹر جنرل آف پولیس (کرائم) دنیش این ایم کی نگرانی میں ایک ایس آئی ٹی تشکیل دی ہے تاکہ معاملے کی مکمل جانچ کی جاسکے۔ مسٹر مشرا نے کہا کہ گوگامیڈی قتل کیس کے دونوں ملزمین کی شناخت کر لی گئی ہے۔ انہوں نے کہا کہ ایف آئی آر درج ہوتے ہی دونوں ملزمان پر پانچ پانچ لاکھ روپے انعام کا اعلان کیا جائے گا اور ان ملزمان کے بارے میں اطلاعات دینے والے کو پانچ پانچ لاکھ روپے انعام دیا جائے گا۔
انہوں نے کہا کہ پولیس قاتلوں کی سرگرمی سے تلاش کر رہی ہے۔ قابل ذکر ہے کہ اس سے قبل گورنر کلراج مشرا نے اس قتل کے بعد پیدا ہونے والی صورتحال کی وجہ سے ریاست کے امن و امان کی صورتحال کا جائزہ لیا اور اس منظم جرائم سے پیدا ہونے والی صورتحال پر مسلسل نظر رکھنے کی ہدایت دی۔ مسٹر مشرا نے خاص طور پر مجرموں کی گرفتاری کے لیے سخت کارروائی کو یقینی بنانے کی بھی ہدایت دی۔ جائزہ میٹنگ میں گورنر نے کہا کہ پولیس اور انتظامیہ کو ہر سطح پر موثر اقدامات کرنے چاہئیں تاکہ ریاست میں امن و امان کسی بھی سطح پر خراب نہ ہو۔