بھونیشور، 9 جنوری (یو این آئی) وزیر اعظم نریندر مودی نے جمعرات کو 18ویں پرواسی بھارتیہ دیوس (پی بی ڈی) کے مقام جنتا میدان سے خصوصی جدید ترین ٹورسٹ ٹرین پرواسی بھارتیہ ایکسپریس کے افتتاحی سفر کو ہری جھنڈی دکھا کر روانہ کیا۔یہ خصوصی ٹورسٹ ٹرین خاص طور پر ہندوستانی تارکین وطن کے لیے ڈیزائن کی گئی ہے۔مسٹر مودی نے اس موقع پر کہا کہ خصوصی ٹرین کو ہری جھنڈی دکھانا 1915 میں مہاتما گاندھی کی جنوبی افریقہ سے ہندوستان واپسی کی سالگرہ کے موقع پر ہے۔ اسی دن 1915 میں مہاتما گاندھی طویل عرصے تک بیرون ملک رہنے کے بعد ہندوستان واپس آئے تھے۔
غور طلب ہے کہ پرواسی بھارتیہ ایکسپریس کو خاص طور پر ہندوستانی تارکین وطن کے لیے ڈیزائن اور تیار کیا گیا ہے، خاص طور پر 45 سے 65 سال کی عمر کے افراد کے لیے۔ ٹرین تین ہفتہ کی مدت میں اہم سیاحتی اور مذہبی مقامات سمیت ملک بھر کے کئی مقامات کا سفر کرے گی۔ ان مقامات میں اجودھیا، پٹنہ، گیا، وارانسی، مہابلی پورم، رامیشورم، مدورائی، کوچی، گوا، ایکتا نگر (کیواڈیا)، اجمیر، پشکر اور آگرہ شامل ہیں۔ہندوستانی تارکین وطن کو ان کی جڑوں سے جوڑنے کے لیے، یہ تین ہفتہ طویل دورہ انڈین ریلوے کیٹرنگ اینڈ ٹورازم کارپوریشن (آئی آرسی ٹی سی) کے تعاون سے وزارت خارجہ کی پرواسی تیرتھ درشن یوجنا (پی ٹی ڈی وائی) اسکیم کے تحت منعقد کیا جا رہا ہے۔ٹرین زیادہ سے زیادہ 156 مسافر بیٹھ سکتے ہیں۔
