نئی دہلی(یو این آئی) سپریم کورٹ نے جمعہ کو ہریانہ حکومت کو ہدایت دی کہ وہ انبالہ کے قریب شمبھو سرحد سے پولیس کی رکاوٹیں ہٹائے، جو 13 فروری سے بند تھی، اور ٹریفک کو سب کے لیے کھول دیا جائے۔جسٹس سوریہ کانت اور جسٹس اجول بھویان کی بنچ نے پنجاب اور ہریانہ ہائی کورٹ کے 10 جولائی کے حکم کو برقرار رکھتے ہوئے ریاستی حکومت کو یہ ہدایت دی۔ہائی کورٹ نے 10 جولائی کو ریاستی حکومت کو انبالہ کے قریب شمبھو بارڈر کو ایک ہفتے کے اندر کھولنے کی ہدایت دی تھی، جسے حکومت نے فروری میں احتجاجی کسانوں کو دہلی کی طرف مارچ کرنے سے روکنے کے لیے بند کر دیا تھا۔
سپریم کورٹ نے یہ ہدایت ریاستی حکومت کی درخواست کی سماعت کے دوران دی جس میں ہریانہ حکومت کی جانب سے پنجاب اور ہریانہ ہائی کورٹ کے 7 مارچ کے فیصلے کو چیلنج کیا گیا تھا۔ہائی کورٹ نے فروری میں احتجاج کرنے والے کسانوں اور پولیس کے درمیان تصادم کے دوران 21 سالہ کسان شوبھاکرن سنگھ کی موت کی تحقیقات کے لیے ہائی کورٹ کے ایک سابق جج کی سربراہی میں ایک کمیٹی قائم کرنے کی ہدایت دی تھی۔سپریم کورٹ میں اس کیس کی سماعت کے دوران ہریانہ حکومت کے وکیل نے عدالت کے سامنے کہا کہ ریاستی حکومت 10 جولائی کو ہائی کورٹ کے حکم کو چیلنج کرنے کی تیاری کر رہی ہے۔اس پر جسٹس سوریہ کانت نے ہریانہ حکومت سے پوچھا کہ "ریاست ہائی وے کو کیسے روک سکتی ہے؟ ٹریفک کو کنٹرول کرنا اس کا فرض ہے۔ ہم اسے کھولنے کے بارے میں نہیں کہہ رہے ہیں، بلکہ اسے کنٹرول کرنے کے بارے میں بھی کہہ رہے ہیں”۔
سینکت کسان مورچہ (ایس کے ایم) اور کسان مزدور مورچہ (کے ایم ایم) کی طرف سے دہلی تک کسانوں کے مارچ کے اعلان کے بعد ہریانہ حکومت نے فروری میں انبالہ-نئی دہلی قومی شاہراہ پر رکاوٹیں کھڑی کر دی تھیں۔ کسانوں کی یہ تحریک فصلوں کے لیے کم از کم امدادی قیمت (ایم ایس پی) کی قانونی ضمانت سمیت دیگر مطالبات کے ساتھ چل رہی ہے۔10 جولائی کو پنجاب اور ہریانہ ہائی کورٹ کے جسٹس جی ایس سندھاوالیا اور جسٹس وکاس بہل کی ڈویژن بنچ نے ہریانہ حکومت کو شمبھو سرحد پر رکاوٹیں ہٹانے کی ہدایت دی تھی۔ ساتھ ہی یہ بھی کہا گیا کہ عام لوگوں کو کسی قسم کی تکلیف کا سامنا نہ کرنا پڑے۔
