نئی دہلی(ہندوستان ایکسپریس نیوز بیورو/ایجنسیاں)دارالحکومت دہلی میں گزشتہ 24 گھنٹوں کے دوران ہونے والی شدید بارش نے کئی برسوں کی بارش کا ریکارڈ توڑ دیا۔خیال رہے کہ دہلی-این سی آر سمیت اتر پردیش کے کئی ضلعوں میں رات سے ہو رہی بارش کے سبب ٹھنڈ میں کافی اضافہ ہو گیا ہے۔ شدید ٹھنڈ کے درمیان جمعہ کی صبح سے ہی شروع ہوئی بارش کہیں کم تو کہیں زیادہ دیر رات تک جاری رہی۔ محکمۂ موسمیات کے مطابق دہلی میں گزشتہ 24 گھنٹوں میں 41.2 ملی میٹر بارش ریکارڈ کی گئی جو کہ 101 سال کے دوران دسمبر کے مہینے میں ایک دن میں ہونے والی سب سے زیادہ بارش ہے۔
اس سے قبل 3 دسمبر 1923ء کو دسمبر کے مہینے میں 1 دن میں سب سے زیادہ 75.7 ملی میٹر بارش ریکارڈ کی گئی تھی۔ محکمۂ موسمیات کے پاس1901ء کے بعد سے اب تک دہلی میں ہر سال دسمبر کے مہینے میں ہونے والی مجموعی بارش کے ریکارڈ کو دیکھا جائے تو دسمبر 2024ء کو فہرست میں پانچویں پوزیشن حاصل ہے۔محکمۂ موسمیات نے آج بھی دہلی میں ہلکی سے درمیانے درجے کی بارش ہونے کا امکان ظاہر کرتے ہوئے یلو الرٹ جاری کر دیا ہے۔آج (ہفتے کو) دہلی کا کم سے کم درجۂ حرارت 12.7 ڈگری سینٹی گریڈ ریکارڈ ہوا ہے۔
