نئی دہلی(ہندوستان ایکسپریس ویب ڈیسک):راجدھانی دہلی کے چھترپور علاقے میں منگل کے روز ’جسٹس فار شردھا‘ کے لیے منعقد ایک ہندو مہاپنچایت کے دوران اس وقت ہنگامہ ہو گیا جب اسٹیج پر ایک خاتون نے ایک مرد کو چپل سے پیٹنا شروع کر دیا۔ ہندو ایکتا منچ کے ذریعہ منعقد یہ مہاپنچایت ’بیٹی بچاؤ‘ پر بھی تھا۔
اس واقعہ کی ویڈیو سوشل میڈیا پر تیزی کے ساتھ ہو رہی ہے۔ ویڈیو میں ایک خاتون، جس کا چہرہ نیلے رنگ کی چنری سے نصف ڈھکا ہوا ہے، ایک جلسہ کو خطاب کرتے ہوئے دیکھی جا سکتی ہے۔ کچھ لمحہ بعد وہ اچانک اپنی چپل نکالتی ہے اور اپنے ساتھ کھڑے شخص کو پیٹنا شروع کر دیتی ہے۔
#WATCH | Chattarpur, Delhi: Woman climbs up the stage of Hindu Ekta Manch's program 'Beti Bachao Mahapanchayat' to express her issues; hits a man with her slippers when he tries to push her away from the mic pic.twitter.com/dGrB5IsRHT
— ANI (@ANI) November 29, 2022
اچانک پیش آئے اس واقعہ سے اسٹیج پر موجود سبھی لوگ حیران رہ گئے۔ انھوں نے فوراً مداخلت کی اور خاتون کو اسٹیج سے اتار دیا گیا۔قومی آواز ڈاٹ کام کی خبر کے مطابق فی الحال یہ معلوم نہیں ہو سکا ہے کہ خاتون نے اس شخص کی پٹائی کس وجہ سے کی۔ دوسری طرف دہلی پولیس نے اس واقعہ کے تعلق سے لاعلمی کا اظہار کیا ہے۔ پولیس نے کہا کہ انھیں اس بارے میں کوئی شکایت نہیں ملی ہے۔ تفصیلات کا انتظار کیا جا رہا ہے۔ اس بارے میں کسی طرح کی شکایت ملنے پر مناسب کارروائی کی جائے گی۔
