5,300 طوفان متاثرین کو راحت کیمپوں میں منتقل کیا گیا

بھیماورم (یو این آئی) آندھرا پردیش کے مغربی گوداوری کی ضلع کلکٹر پی پرشانتی نے کہا کہ طوفان سے متاثرہ 5,300 سے زیادہ لوگوں کو ضلع کے 26 ریلیف کیمپوں میں منتقل کیا گیا ہے اور اس دوران جان و مال کے نقصان سے بچنے کے لیے تمام اقدامات کیے گئے ہیں۔منگل کو یہاں میڈیا سے بات چیت کرتے ہوئے محترمہ پرشانتی نے کہا کہ نشیبی علاقوں اور غیر محفوظ مقامات پر رہنے والے 5,300 سے زیادہ لوگوں کو 26 ریلیف کیمپوں میں منتقل کیا گیا ہے اور انہیں تمام سہولیات اور خوراک فراہم کی جا رہی ہے۔کلکٹر نے کہا کہ اب تک کسانوں سے 1.50 لاکھ ٹن دھان خریدا جا چکا ہے اور باقی دھان کی پیداوار کو زرعی منڈی کے احاطے میں منتقل کر دیا گیا ہے۔ انہوں نے کہا کہ کچھ کسانوں نے اپنی دھان کی پیداوار کو پلاسٹک کی چادروں سے ڈھانپ کر گیلے ہونے سے بچایا۔
انہوں نے کہا کہ ہندوستانی محکمہ موسمیات (آئی ایم ڈی) کی پیشن گوئی کے مطابق منگل کی آدھی رات سے ضلع میں شدید بارش ہوگی۔چونکہ موسلادھار بارش کی وجہ سے گاووں میں پانی جمع ہونے کا خدشہ ہے، اس لیے منریگا کارکنوں کا استعمال کرتے ہوئے پانی کی نکاسی کے لیے اقدامات کیے جا رہے ہیں۔کلکٹر نے کہا کہ حکومتی حکم کے مطابق ریلیف کیمپوں میں منتقل ہونے والے ہر کنبہ کو حالات معمول پر آنے کے بعد کیمپ چھوڑنے پر 2500 روپے دیے جائیں گے۔ انہوں نے کہا کہ حاملہ خواتین کو احتیاطی اقدام کے طور پر پہلے ہی سرکاری اسپتال منتقل کر دیا گیا تھا۔ انہوں نے کہا کہ جانوروں کو محفوظ مقامات پر لے جانے کے لیے بھی اقدامات کیے گئے ہیں۔محترمہ پرشانتی نے کہا کہ پیر اور منگل کو تعلیمی اداروں میں تعطیل کا اعلان کیا گیا ہے۔ انہوں نے اعلان کیا کہ تعلیمی اداروں میں چھٹی کے اعلان کا فیصلہ بدھ کو صورتحال کا جائزہ لینے کے بعد کیا جائے گا۔