نئی دہلی، یکم اکتوبر (یو این آئی) مرکزی وزارت داخلہ نے ریاستی ڈیزاسٹر رسپانس فنڈ سے مرکزی حصہ کے طور پر 5,858.60 کروڑ روپے اور سیلاب سے متاثرہ 14 ریاستوں کو نیشنل ڈیزاسٹر ریسپانس فنڈ سے پیشگی رقم جاری کی ہے۔مرکزی حکومت نے مہاراشٹر کو 1,492 کروڑ روپے، آندھرا پردیش کو 1,036 کروڑ روپے، آسام کو 716 کروڑ روپے، بہار کو 655.60 کروڑ روپے، گجرات کو 600 کروڑ روپے، ہماچل پردیش کو 189.20 کروڑ روپے، کیرالہ کو 145.60 کروڑ روپے دیے ہیں۔ منی پور کو 50 کروڑ، میزورم کو 21.60 کروڑ، ناگالینڈ کو 19.20 کروڑ، سکم کو 23.60 کروڑ، تلنگانہ کو 416.80 کروڑ، تریپورہ کو 25 کروڑ اور مغربی بنگال کو 468 کروڑ روپے جاری کیے گئے ہیں۔ یہ ریاستیں اس سال جنوب مغربی مانسون کے دوران انتہائی شدید بارشوں، سیلاب اور لینڈ سلائیڈنگ سے متاثر ہوئی ہیں۔
مودی حکومت قدرتی آفات سے متاثرہ ریاستوں کے لوگوں کی مشکلات کو کم کرنے کے لیے ان کے ساتھ کندھے سے کندھا ملا کر کھڑی ہے۔بین وزارتی مرکزی ٹیموں کو سیلاب سے متاثرہ ریاستوں آسام، میزورم، کیرالہ، تریپورہ، ناگالینڈ، گجرات، آندھرا پردیش، تلنگانہ اور منی پور میں بھیجا گیا تاکہ وہ موقع پر ہونے والے نقصانات کا جائزہ لے سکیں۔
مزید برآں، جلد ہی ٹیموں کو بہار اور مغربی بنگال بھیجا جائے گا تاکہ موقع پر ہونے والے نقصان کا اندازہ لگایا جا سکے۔ یہ دونوں ریاستیں حال ہی میں سیلاب سے متاثر ہوئی ہیں۔ قائم کردہ نظام کے مطابق ٹیم کی تشخیصی رپورٹ موصول ہونے کے بعد آفات سے متاثرہ ریاستوں کو قومی خزانے سے اضافی مالی امداد کی منظوری دی جائے گی۔
اس سال 21 ریاستوں کو 14,958 کروڑ روپے سے زیادہ کے فنڈز جاری کیے گئے ہیں۔ اس میں ریاستی فنڈ سے 21 ریاستوں کو 9,044.80 کروڑ روپے، قومی فنڈ سے 15 ریاستوں کو 4,528.66 کروڑ روپے اور ریاستی آفات تخفیف فنڈ سے 11 ریاستوں کو 1,385.45 کروڑ روپے شامل ہیں۔مالی امداد کے علاوہ مرکزی حکومت نے سیلاب سے متاثرہ تمام ریاستوں کو ضرورت کے مطابق رسپانس فورس، آرمی ٹیموں اور فضائیہ کی مدد سمیت تمام لاجسٹک مدد فراہم کی ہے۔
