اداکارہ وجے شانتی تلنگانہ میں کانگریس کی چیف کنوینر بن گئیں

نئی دہلی، 18 نومبر (یو این آئی) کانگریس نے حال ہی میں بھارتیہ جنتا پارٹی کو چھوڑ کر پارٹی میں واپس لوٹنے والی لوک سبھا کی سابق رکن اور مشہور اداکارہ وجے شانتی کو تلنگانہ اسمبلی کی انتخابی مہم کمیٹی کی چیف کوآرڈینیٹر اور کنوینر مقرر کیا ہے۔
کانگریس جنرل سکریٹری کے سی وینوگوپال نے ہفتہ کے روز یہ اطلاع دیتے ہوئے کہا کہ پارٹی صدر ملک ارجن کھڑگے نے 15 دیگر سینئر لیڈروں کو محترمہ وجے شانتی کی زیرقیادت رابطہ کمیٹی میں ممبر کے طور پر تعینات کیا ہے۔
واضح رہے کہ 2020 میں بی جے پی میں شامل ہونے والی اداکارہ وجے شانتی نے دو روز قبل اسمبلی انتخابات کی انتخابی مہم کے درمیان کانگریس صدر ملک ارجن کھڑگے کی موجودگی میں پارٹی میں واپسی کی تھی۔ وہ بھارت راشٹر سمیتی کی لوک سبھا رکن رہ چکی ہیں۔