نئی دہلی (یو این آئی) قومی دارالحکومت میں تعلیمی سال 2025-26 کے لیے پرائیویٹ غیر امدادی اسکولوں میں پری اسکول (نرسری)، پری پرائمری (کے جی) اور پہلی جماعت کے داخلے کا عمل 28 نومبر سے شروع ہوگا۔ڈائریکٹوریٹ آف ایجوکیشن کے مطابق 20 دسمبر تک درخواستیں دی جا سکتی ہیں۔ داخلہ کی پہلی فہرست 17 جنوری، دوسری فہرست 3 فروری کو جاری کی جائے گی اور حتمی عمل اگلے سال 14 مارچ تک مکمل کیا جائے گا۔
ڈائریکٹوریٹ آف ایجوکیشن نے ایک حکم نامے میں بچوں کو داخلہ لیول کی کلاسوں میں داخل کرنے والے اسکولوں کو ہدایت دی کہ وہ معاشی طور پر کمزور طبقے، پسماندہ گروپ اور معذور بچوں کے لیے 25 فیصد نشستیں محفوظ رکھیں۔
اسکولوں کو 25 نومبر 2024 تک ڈائریکٹوریٹ کی ویب سائٹ پر انٹری لیول کی کلاسوں (ای ڈبلیو ایس/ڈی جی /سی ڈبلیو ایس این زمرہ کی نشستوں کے علاوہ) میں کھلی نشستوں کے تحت داخلوں کے بارے میں معلومات اپ لوڈ کرنے کی بھی ہدایت دی گئی ہے۔ مزید برآں، ہر اسکول اس بات کو یقینی بنائے گا کہ داخلے کے لئے درخواست فارم تمام درخواست دہندگان کو داخلہ درخواست فارم جمع کرنے کی آخری تاریخ یعنی 20 دسمبر 2024 تک دستیاب کرادی جائیں۔ والدین سے داخلہ رجسٹریشن فیس کے طور پر صرف 25 روپے (ناقابل واپسی) لئے جا سکتے ہیں۔
حکم میں کہا گیا ہے، "چونکہ اسکول داخلہ کے لیے متعلقہ نمبروں کے ساتھ معیار کو اپ لوڈ کریں گے، اس لیے شارٹ لسٹ کیے گئے امیدواروں کی پہلی فہرست، معیار کے مطابق ان کے حاصل کردہ نمبروں کے ساتھ، 17 جنوری 2025 کو اعلان کی جائے گی۔” 18 جنوری 2025 سے 27 جنوری 2025 تک 10 دن اسکولوں کو مختص کیے گئے ہیں تاکہ وہ اپنے وارڈز کو الاٹ کیے گئے نمبروں سے متعلق والدین کے سوالات کے جوابات دیں۔
حکم نامے میں کہا گیا ہے کہ ایسے معاملات میں جہاں ایک ہی سیٹ کے لیے امیدوار برابر ہوں گے، اسکول قرعہ اندازی کریں گے۔ڈائریکٹوریٹ آف ایجوکیشن نے کہا، "قرعہ اندازی (یا تو کمپیوٹرائزڈ یا پرچی کے ذریعے) شفاف طریقے سے منعقد کی جانی چاہیے، والدین موجود ہوں، ویڈیو پر ریکارڈ کی گئی ہواور اسکول کی طرف سے رکھی گئی ہو۔”اگر ضروری ہو تو قرعہ اندازی والدین کی موجودگی میں شفاف طریقے سے کروائی جائے۔ڈائریکٹوریٹ آف ایجوکیشن نے 31 مارچ تک نرسری کے لیے عمر کی حد چار سال، کنڈرگارٹن کے لیے پانچ سال اور پہلی جماعت کے لیے چھ سال مقرر کی ہے۔
