گلمرگ میں شبانہ درجہ حرارت نقطہ انجماد سے نیچے درج
سری نگر (یو این آئی) محکمہ موسمیات کی پیش گوئی کے عین مطابق وادی کشمیر میں برف وباراں کے ایک اور مرحلہ شروع ہوا ہے اور اس بیچ مطلع ابر آلود رہنے سے شبانہ درجہ حرارت میں قدرے اضافہ درج ہوا ہے۔متعلقہ محکمے کے ایک ترجمان کے مطابق وادی میں 11 نومبر تک برف وباراں متوقع ہے۔
انہوں نے کہا کہ وادی میں 9 نومبر سے 11 نومبر کے دوپہر تک بالائی علاقوں میں کہیں کہیں ہلکی سے درمیانی درجے کی برف باری اور میدانی علاقوں میں رک رک کر بارشوں کا سلسلہ جاری رہ سکتا ہے۔
ان کا کہنا تھا کہ بعد ازاں موسم میں بتدریج بہتری واقع ہونے کا امکان ہے اور پھر 12 سے16 نومبر تک موسم خشک رہنے کی توقع ہے۔ترجمان کا کہنا ہے کہ اس دوران سری نگر- جموں قومی شاہراہ، زوجیلا پاس اور لیہہ منالی سڑک پر ٹریفک کی آمد و رفت عارضی طور پر متاثر ہوسکتی ہے۔وادی کے سیاحتی مقام گلمرگ میں گذشتہ چوبیس گھنتوں کے دوران 2 سینٹی میٹر تازہ برف جمع ہوئی ہے جبکہ پہلگام میں اس مدت کے دوران 0.5 ملی میٹر بارش ریکارڈ ہوئی ہے۔
ادھر وادی میں مطلع ابر آلود رہنے سے شبانہ درجہ حرارت میں قدرے اضافہ درج ہوا ہے تاہم گلمرگ میں شبانہ درجہ حرارت نقطہ انجماد سے نیچے ہی ریکارڈ ہوا ہے۔
گرمائی دارلحکومت سری نگر میں کم سے کم 5.4 ڈگری سینٹی گریڈ ریکارڈ کیا گیا جو گذشتہ شب کے درجہ حرارت سے 1.1 ڈگری سینٹی گریڈ زیادہ ریکارڈ ہوا تھا۔وادی کے مشہور دہر سیاحتی مقام گلمرگ میں کم سے کم درجہ حرارت منفی 2.0 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی2.6 ڈگری سینٹی گریڈ ریکارڈ ہوا تھا۔وادی کے دوسرے مشہور سیاحتی مقام پہلگام میں کم سے کم درجہ حرارت2.9 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی1.6 ڈگری سینٹی گریڈ ریکارڈ ہوا تھا۔
سرحدی ضلع کپوارہ میں کم سے کم درجہ حرارت 4.7 ڈگری سینٹی گریڈ ریکارڈ کیا گیا جو گذشتہ شب کے درجہ حرارت سے1.9 ڈگری سینٹی گریڈ زیادہ ریکارڈ ہوا تھا۔گیٹ وے آف کشمیر کے نام سے مشہور قصبہ قاضی گنڈ میں کم سے کم درجہ حرارت5.0 ڈگری سینٹی گریڈ ریکارڈ کیا گیا جہاں گذشتہ شب بھی یہی درجہ حرارت ریکارڈ ہوا تھا۔
