جموں کے پہاڑی علاقوں میں فوج کا تلاشی آپریشن

جموں(یواین آئی)یوم جمہوریہ کے پیش نظر خط پیر پنچال کے پہاڑی علاقوں میں فوج نے بڑے پیمانے پر آپریشن شروع کیا ہے۔
اطلاعات کے مطابق خط پیر پنچال کے ڈوڈہ ، کشتواڑ، اور راجوری اضلاع کے پہاڑی علاقوں میں سیکورٹی فورسز نے منگل کے روز تلاشی آپریشن شروع کیا۔ذرائع نے بتایا کہ سماج دشمن عناصر کے منصوبوں کو ناکام بنانے کی خاطر سرحدی علاقوں میں فوج کو مستعد رہنے کے احکامات جاری کئے گئے ہیں۔ذرائع کا کہنا ہے کہ فوج ، بی ایس ایف نے مشترکہ طورپر پہاڑی علاقوں کو محاصرے میں لے کر لوگوں کے چلنے پھرنے پر پابندی عائد کی۔کسی بھی ناگہانی واقعہ سے نمٹنے کے لئے سرحدی علاقوں میں فوج کی بھاری نفری کو تعینات کیا گیا ہے ۔جہاں دراندازی کی کسی بھی کوشش کو ناکام بنانے کے لئے ایل او سی اور بین الاقوامی سرحد پر تعینات فوجیوں کو الرٹ حالت میں رکھا گیا ہے، وہیں میدانی علاقوں میں جنگجووں کی سرگرمیوں پر بریک لگانے کے لئے تلاشیوں اور گشت کا سلسلہ تیز کیا گیا ہے۔
دریں اثنا جموں صوبے کے اطراف واکناف بالخصوص مختلف اضلاع کو سرمائی دارالحکومت کے ساتھ جوڑنے والی سڑکوں پر سیکورٹی فورسز اور ریاستی پولیس کے خصوصی ناکے بٹھائے گئے ہیں جہاں چھوٹی بڑی گاڑیوں کو روک کر ان کی تلاشی لی جاتی ہے اور ان میں سوار مسافروں کی جامہ تلاشی لینے کے علاوہ شناختی کارڈ چیک کئے جاتے ہیں۔ذرائع نے بتایا کہ جموں کے سبھی پولیس اسٹیشنوں میں تعینات عملے کو ہائی الرٹ پر رہنے کے احکامات جاری کئے گئے۔
ذرائع کے مطابق سری نگر کی طرف جانے والی سبھی شاہراوں پر خصوصی ناکے بٹھائے گئے ہیں اور کسی بھی گاڑی کو بغیر تلاشی آگے جانے کی اجازت نہیں دی جارہی ہیں۔