بی جے پی کو عوام کی نہیں بلکہ صرف اپنے اقتدار کی فکرہے : زماں خان

ُپٹنہ ( یواین آئی )منگل کو جنتا دل یونائٹیڈ ( جے ڈی یو ) ہیڈکوارٹر میں بہار حکومت میں اقلیتی فلاح کے وزیر مسٹر زماں خان نے ریاست کے مختلف اضلاع سے آئے عام لوگوں کی شکایات سننے کے بعد متعلقہ افسران کو ان کے حل کے لیے ضروری ہدایات دیں۔پروگرام میں میڈیا کے نمائندوں سے بات کرتے ہوئے مسٹر زماں خان نے کہا کہ ہمارے لیڈر نتیش کمار کی انتھک کوششوں سے ملک بھر کی اپوزیشن ایک پلیٹ فارم پر متحد ہوئی ہے۔انہوں نے کہا کہ نہ صرف بہار بلکہ پورے ملک کے لوگ چاہتے ہیں کہ مسٹر نتیش کمار ملک کی قیادت کریں۔ ملک کے عام لوگ ملک کے آئین، جمہوریت اور باہمی بھائی چارے کو بچانے کے لیے ہمارے لیڈر مسٹر نتیش کمار کی طرف امید بھری نظروں سے دیکھ رہے ہیں۔
انہوں نے کہا کہ ہمارے قائد کا امیج ملک اور دنیا میں’ وکاس پروش ‘کے طور پر ابھرا ہے۔ اتنے طویل سیاسی کیریئر کے بعد بھی انہوں نے ذات پات اور مذہب کے نام پر کبھی کوئی متنازعہ بیان نہیں دیا۔ ممبران پارلیمنٹ کی معطلی پر مسٹر زماںخان نے کہا کہ مرکز کی مودی حکومت کو عوام کے مسائل سے کوئی سروکار نہیں ہے۔ اسے صرف اپنی کرسی کی فکر ہے اور عوام سے جھوٹ بول کر اپنی کرسی بر قرار رکھناچاہتے ہیں۔اس دوران پارٹی کے ریاستی جنرل سکریٹری ارون کمار سنگھ بھی موجود تھے۔