کرناٹک کے وی وی آئی پی علاقوں میں بلاسٹ کی دھمکی ملی

بنگلورو (یو این آئی) کرناٹک کے رامیشورم کیفے میں بم دھماکے کے چند دن بعد وزیر اعلیٰ سدارامیا اور نائب وزیر اعلیٰ ڈی کے شیوکمار کے ساتھ ایک اعلیٰ پولیس افسر اور وزراء کو ای میل بھیجے گئے، جن میں وی وی آئی پی اور بھیڑ بھاڑ والے علاقوں کو نشانہ بناکر اور ریاست میں مزید جگہوں کو اڑانے کی دھمکیاں دی گئیں۔
اس دھمکی آمیز میل کی تصدیق پولس کمشنر بی دیانند نے بھی منگل کو کی۔ وزیر داخلہ ڈاکٹر جی پرمیشور کو بھی دھمکی آمیز میل موصول ہوا ہے۔ سائبر پولیس پہلے ہی ایکشن میں آگئی ہے اور معاملے کی مکمل چھان بین کر رہی ہے۔
بتایا جاتا ہے کہ یہ ای میلز مبینہ طور پر شاہد خان نامی شخص نے ای میل آئی ڈی Shahidkhan10786@protonmail.com سے بھیجی ہیں اور مزید دھماکوں کو روکنے کے لیے 25 لاکھ ڈالر کا مطالبہ کیا ہے۔
مسٹر دیانند نے کہا، "پولیس نے ای میل آئی ڈی کی تفصیلات فراہم کرنے کے لئے پروٹون کمپنی کو لکھا ہے۔ انہوں نے کہا کہ ایک بار جب ہمیں ضروری تفصیلات مل جائیں گی تو ہم تحقیقات میں مزید پیش رفت کریں گے۔
اعلیٰ پولیس افسر کا کہنا تھا کہ ’پیر کو ای میل کی دھمکی موصول ہوئی تھی، اس حوالے سے تحقیقات شروع کردی گئی ہیں۔
میل میں ‘دھماکہ الرٹ 02’ سلگ ہے جس میں لکھا ہے، "الرٹ 01 فلم کے ٹریلر کے بارے میں آپ کے کیا خیالات ہیں؟ اگر آپ ہمیں 25 لاکھ ڈالر نہیں دیں گے تو ہم بسوں، ٹرینوں، ٹیکسیوں میں بڑے دھماکے کریں گے۔ پورے کرناٹک میں مندر، ہوٹل اور عوامی علاقے اس سے متاثر ہوئے بغیر نہیں رہیں گے۔
میل میں لکھا تھا، "الرٹ 02: ہم آپ کو ایک اور ٹریلر دکھانا چاہیں گے۔ اگلا دھماکہ ہم امباری اتسو بس میں کرنے جا رہے ہیں۔ امباری اتسو دھماکے کے بعد ہم سوشل میڈیا پر اپنے مطالبات اٹھائیں گے۔ اور آپ کو بھیجے گئے میلز کے اسکرین شاٹس سوشل میڈیا پر اپ لوڈ کریں گے۔ ہم اگلے دھماکہ کے بارے میں معلومات بھی ٹویٹ کریں گے۔
ملزم نے ‘shahidkhan11786@protonmail.com’ آئی ڈی کے ذریعے ایک اور ای میل بھیجی۔ پولیس کو شبہ ہے کہ ای میل آئی ڈی پراکسی ہیں جو بھیجنے والے کی شناخت چھپاتی ہے۔
ریاستی کانگریس کے صدر شیوکمار نے کہا کہ ان کے دفتر کو ہفتہ کو ای میل موصول ہوا اور انہوں نے اسے اسی دن سٹی پولیس کمشنر کو بھیج دیا۔ حکام کے مطابق سائبر کرائم پولیس نے معاملہ درج کر لیا ہے اور معاملے کی تحقیقات کر رہی ہے۔
پولیس نے کہا کہ حفاظتی اقدامات میں اضافہ کر دیا گیا ہے اور شہر کو اگلے چند دنوں کے لیے ‘ہائی الرٹ’ پر رکھا گیا ہے۔
قابل ذکر ہے کہ پروٹون سوئٹزرلینڈ کی ایک سافٹ ویئر کمپنی ہے۔ یکم مارچ کو رامیشورم کیفے میں کم شدت والا بم دھماکہ ہوا جس میں دس افراد زخمی ہوئے۔ نیشنل انویسٹی گیشن ایجنسی (این آئی اے) نے دھماکے کی تحقیقات اپنے ہاتھ میں لے لی ہیں۔