نئی دہلی، 25 جولائی (یو این آئی) دہلی کے وزیر خزانہ آتشی نے جمعرات کو دہلی کے لوگوں پر سوتیلی ماں والا سلوک کرنے کا الزام لگاتے ہوئے کہا کہ بھارتیہ جنتا پارٹی (بی جے پی) کی حکمرانی والی مرکزی حکومت نے ہر بجٹ میں دہلی کے عوام کو دس سال سے دھوکہ دیا ہے۔
محترمہ آتشی نے آج کہا کہ گزشتہ 10 سالوں میں دہلی کے لوگوں نے مرکزی حکومت کو 15,59,933 کروڑ روپے کا انکم ٹیکس ادا کیا اور اس کے بدلے میں دہلی کو صرف 7,534 کروڑ روپے ملے۔ انہوں نے کہا کہ مہاراشٹر کو 5 لاکھ کروڑ روپے کے انکم ٹیکس کے مقابلے میں 50،000 کروڑ روپے مختص کیے جاتے ہیں، کرناٹک کو 2 لاکھ کروڑ روپے کے انکم ٹیکس کے مقابلے میں 30،000 کروڑ روپے ملتے ہیں۔
انہوں نے کہاکہ بی جے پی کی مرکزی حکومت نے 10 سالوں میں دہلی کے لوگوں سے 15 لاکھ کروڑ روپے ٹیکس وصول کیا، لیکن بدلے میں صرف 7500 کروڑ روپے دیے۔ یہ انگریزوں کے زمانے جیسا ظلم ہے۔ اگر مرکزی حکومت ملک کی باقی ریاستوں کو پیسہ دے سکتی ہے تو دہلی کے لوگوں کو بھی ان کا صحیح پیسہ ملنا چاہیے۔
انہوں نے کہا کہ آج مرکزی حکومت دہلی کے لوگوں پر انگریزوں کی طرح تشدد کر رہی ہے۔ جیسے انگریز ہندوستان سے لوگوں کا پیسہ باہر لے جاتے تھے اور بدلے میں ہندوستان کو کچھ نہیں ملتا تھا، صرف ٹکڑے ملتے تھے۔ آج اسی طرح مرکزی حکومت دہلی والوں کے ٹیکس کا پیسہ لے رہی ہے۔ پچھلے 10 سالوں میں 15 لاکھ کروڑ روپے سے زیادہ کا انکم ٹیکس لیا گیا ہے اور اس کے بدلے میں صرف 7500 کروڑ روپے ملے ہیں۔
