ملک کا وفاقی ڈھانچہ اور مشترکہ ورثہ خطرے میں: وششٹھ نارائن

پٹنہ( یواین آئی ) جنتادل یونائٹیڈ ( جے ڈی یو ) کے سابق ریاستی صدر اور راجیہ سبھا کے سینئر رکن وششٹھ نارائن سنگھ نے آج پارٹی دفتر میں منعقدہ ملن تقریب میں کہا کہ ملک کا وفاقی ڈھانچہ اور مشترکہ ورثہ خطرے میں ہے۔ آج ہمیں اپنے آئین اور سیکولر اقدار کو بچانے کے چیلنج کا سامنا ہے۔ جذباتی مسائل کی آڑ میں معاشرے کو تقسیم کرنے اور ہماری تاریخ بدلنے کا کھیل کھیلا جا رہا ہے۔
ملک کو درپیش بحران کو محسوس کرتے ہوئے وزیر اعلیٰ نتیش کمار نے اپوزیشن جماعتوں کے لیڈروں کو پٹنہ بلایا اور انڈیا اتحاد کی تشکیل کی۔ یہ اتحاد ملک کی ضرورت تھا۔ ہمیں اس بات کو یقینی بنانے پر توجہ مرکوز کرنی ہوگی کہ ملک کے نوجوان بی جے پی کے جال میں نہ پھنسیں۔ مسٹر وششٹھ نارائن سنگھ نے مزید کہا کہ جے ڈی یو ایک سیکولر پارٹی ہے۔ ہم ان لوگوں کو اپنا آئیڈیل سمجھتے ہیں جنہوں نے ہمیں آزادی دی۔ ہم نے ورثے کو بچانے کے لیے کام کیا ہے۔ ہم ایک ایسی جماعت ہیں جو ترقی کے ایجنڈے پریقین رکھتے ہیں۔ انہوں نے مزید کہا کہ ہندوستان کے وزیر اعظم خواتین کے ریزرویشن کی بات کر رہے ہیں لیکن پہلی بارمسٹر نتیش کمار نے بہار کی خواتین کو پنچایتی راج اور میونسپل اداروں میں 50 فیصد ریزرویشن دینے کا کام کیا۔ انہوں نے کہا کہ اقلیتی طبقہ کی بہتری کے لیے جتنا کام مسٹر نتیش کمار نے کیا ہے اتنا کسی نے نہیں کیا۔ تعلیمی مرکز سمیت کئی دیگر پروگراموں اور اسکیموں کے ذریعے وزیر اعلیٰ نتیش کمار نے اقلیتی برادری کو سماجی اور اقتصادی طور پر بااختیار بنانے کا کام کیا۔