کانگریس امیدوار کے معاون کے قتل کیخلاف د گ وجے کا احتجاج ختم

چھترپور/بھوپال، 19 نومبر (یو این آئی) مدھیہ پردیش کے چھتر پور ضلع کے کھجوراہو علاقے میں کانگریس لیڈر وکرم سنگھ عرف ناتی راجہ کے معاون سلمان کے مبینہ قتل کے خلاف کانگریس کے سینئر لیڈر اور سابق وزیر اعلیٰ دگ وجے سنگھ کا جاری دھرنا ختم ہو گیا۔ وہ اس معاملے پر کل سےدھرنے پر بیٹھے ہوئے تھے۔احتجاج ختم کرنے کے بعد مسٹر سنگھ نے کہا کہ وہووٹنگ کے دوران جہاں جہاں کانگریس امیدواروں اور ان کے حامیوں پر حملہ کئے گئے وہاں جائیں گے۔ انہوں نے کارکنوں سے متحد ہونے کی اپیل بھی کی ہے۔ مسٹر سنگھ کل ساگر ضلع کے راہلی کا بھی دورہ کر سکتے ہیں، جہاں بی جے پی اور کانگریس کارکنوں کے درمیان جھڑپ کے دوران کانگریس امیدوار کی گاڑیوں میں توڑ پھوڑ کی گئی تھی۔اس سے پہلے، مسٹر سنگھ نے ایکس پر پوسٹ کیا کہ کل سے تقریباً 24 گھنٹے ہو چکے ہیں۔ لیکن انتظامیہ نے کوئی کارروائی نہیں کی۔ نہ گواہوں کے بیانات لیے گئے اور نہ ہی ملزمان کی گرفتاری عمل میں آئی۔
دوسری جانب سابق وزیر اعلیٰ کمل ناتھ نے بھی اس معاملے کے تعلق سے ایکس پر پوسٹ کیا اور کہا کہ چھتر پور ضلع کے راج نگر اسمبلی میں کانگریس کارکن کا بے دردی سے قتل کر دیا گیا۔ بی جے پی امیدوار اروند پٹریا اور ان کے ساتھیوں پر قتل کا الزام ہے۔ اس واقعہ کو دو دن گزر چکے ہیں لیکن اب تک نہ تو وہ گاڑیاں پکڑی گئی ہیں جن میں کانگریس کارکن سلمان کو کچل کر ہلاک کیا گیا تھا اور نہ ہی اس قتل کے ملزموں کو گرفتار کیا گیا ہے۔
انہوں نے کہا کہ راجیہ سبھا ایم پی مسٹر سنگھ اور کانگریس ایم ایل اے اور کارکن کھجوراہو میں پولیس اسٹیشن کے سامنے دھرنے پر بیٹھے ہیں، لیکن پولیس کوئی کارروائی نہیں کر رہی ہے۔ کیا یہ مان لیا جائے کہ مدھیہ پردیش میں قانون کی حکمرانی نہیں ہے؟ آخر قاتلوں کو کون بچا رہا ہے اور کس کی ہدایت پر پولیس اور انتظامیہ خاموشی اختیار کیے ہوئے ہے؟ وہ کانگریس کارکنوں کو بتانا چاہتے ہیں کہ پوری پارٹی ہر کارکن کے پیچھے کھڑی ہے۔ کسی بھی کارکن پر ظلم پوری پارٹی پر حملہ ہے۔ ہم متحد ہو کر اس ظلم کے خلاف لڑیں گے اور انصاف حاصل کریں گے۔ ظلم کے ساتھ کھڑے ہونے والوں کو بھی اس کا خمیازہ بھگتنا پڑے گا۔
دراصل ووٹنگ سے ایک دن قبل جمعرات کی رات راج نگر اسمبلی حلقہ سے کانگریس کے امیدوار وکرم سنگھ عرف ناتی راجہ کا کھجوراہو تھانہ کے چندر نگر ٹوریا علاقے میں اپنے حامیوں کی موجودگی میں بی جے پی امیدوار اروند پٹیریا اور ان کے حامیوں کے ساتھ جھگڑا ہوگیا۔ اسی دوران ناتی راجہ کا معاون سلمان فور وہیلر کی زد میں آکر جاں بحق ہوگیا۔ اس معاملے میں ناتی راجہ کی شکایت پر جمعہ کو کھجوراہو پولیس اسٹیشن میں پٹریا اور ان کے حامیوں کے خلاف مختلف دفعات کے تحت مقدمہ درج کیا گیا ہے۔