اے ایم یومیں ڈی ایس ڈبلیو کی میٹنگ، صحت و صفائی کمیٹیوں کو مزید فعال بنانے پر زور

علی گڑھ:علی گڑھ مسلم یونیورسٹی (اے ایم یو) کے ڈین، اسٹوڈنٹس ویلفیئر، پروفیسر عبدالعلیم نے یونیورسٹی کیمپس کی صورتحال کا جائزہ لینے کے لیے طلباء و طالبات کے مختلف اقامتی کے پرووسٹوں کے ساتھ آج ایک میٹنگ کی اور حفظان صحت اور صفائی سے متعلق امور پر مشاورت کی۔ صحت و صفائی کی کمیٹیاں جو متعلقہ اقامتی ہالوںکے مکینوں پر مشتمل ہیں زیادہ فعال طریقے سے کام کریں گی۔ کمیٹی متعلقہ ہاسٹلوں میں صفائی ستھرائی کی نگرانی کرے گی اور اس بات کو یقینی بنائے گی کہ کھانے کے مناسب انتظام کے ساتھ ساتھ اس کے ضیاع سے بچا جائے۔
پرووسٹوں سے درخواست کی گئی ہے کہ وہ اپنے اقامتی ہالوں میں چوکس رہیں اور باقاعدہ معائنہ کرتے رہیں۔ ٹوٹی ہوئی چہاردیواریوں کی مرمت کی جائے گی جو سیکورٹی کے لیے خطرہ ہیں اور ان کی مرمت ترجیحی بنیادوں پر کی جائے گی۔ یونیورسٹی انجینئر ایسے تمام انٹری پوائنٹس کی مرمت کے لیے ایک تفصیلی رپورٹ پیش کریں گے۔
اے ایم یو جانوروں کی ہمدردانہ دیکھ بھال کے سلسلہ میں پرعزم ہے اور جانوروں کے ساتھ ظلم کی روک تھام کے لیے بھی پابند ہے۔ اس کے ساتھ ہی طلباء کے لیے بیداری پروگرام منعقد کیے جائیں گے ۔ طلباء سے درخواست کی گئی ہے کہ وہ جانوروں کے حملے کے کسی بھی واقعے کی فوری اطلاع دیںتاکہ معقول اور بروقت کارروائی کی جاسکے۔
جانوروں کے تئیں حساس رویے اپنانے اور یونیورسٹی کے سرسبز و شاداب ماحول کی اہمیت سمجھانے کے لئے اقامتی ہالوں اور دیگر اداروں کی جانب سے بیداری مہم چلائی جائے گی ۔
دریں اثنا یونیورسٹی پراکٹر پروفیسر محمد وسیم علی نے بتایا کہ سرسید ہاؤس میں تعینات سیکورٹی گارڈ کو کتے کے حالیہ حملے کے واقعے سے متعلق انکوائری مکمل ہونے تک کے لیے ڈیوٹی سے علاحدہ رکھا گیا ہے۔