برج بھوشن شرن کے فرزند کو بھاجپا کا امیدوار بنانے پر اٹھی انگلی!

نئی دہلی: اولمپک جیتنے والی ریسلر ساکشی ملک نے برج بھوشن شرن سنگھ کے بیٹے کوبھارتیہ جنتاپارٹی کے ذریعہ ٹکٹ دیئے جانے پر ردعمل کا اظہار کیا ہے۔ ساکشی ملک نے سوشل میڈیا سائٹ ایکس پر لکھا ہے کہ ’ملک کی بیٹیاں ہار گئیں، برج بھوشن جیت گیا‘۔انہوں نے کہا کہ برج بھوشن شرن سنگھ کی گرفتاری تو دور کی بات ہے، ان کے بیٹے کو ٹکٹ دیا گیا ہے۔ بی جے پی نےآج ان کے بیٹے کو ٹکٹ دے کرملک کی کروڑوں بیٹیوں کے حوصلے توڑ دیا ۔موجودہ حکومت پر سوال اٹھاتے ہوئے ساکشی ملک نے اپنی پوسٹ میں لکھا ہے کہ” ٹکٹ جائے گی صرف ایک خاندان کو تو کیا ملک کی حکومت اتنی کمزورہوتی ہے ایک آدمی کے سامنے؟
ایک اور خاتون ریسلر سنگیتا پھوگاٹ نے بھی اس پر افسوس کا اظہار کیا ہے۔ سنگیتا پھوگاٹ نے ایکس پر لکھا ’’میں خاموش ہوں۔ بس اس خبر دیکھے جارہی ہوں‘‘۔
ساکشی ملک اپنے ساتھی پہلوانوں ونیش پھوگٹ اور بجرنگ پونیا کے ساتھ ایک سال سے زائد عرصے سے جنسی ہراسانی کیس میں ملزم برج بھوشن شرن سنگھ کے خلاف لڑ رہی ہیں۔ اس بار بی جے پی نے قیصر گنج سیٹ سے برج بھوشن شرن سنگھ کا ٹکٹ منسوخ کر دیا لیکن ان کے بیٹے کرن سنگھ کو اپنا امیدوار بنایا ہے۔ اپوزیشن جماعتوں کے رہنما بھی اس پر تنقید کر رہے ہیں۔