شیوراج کو کالے جھنڈے دکھانے پر پانچ کو بھیجا گیا جیل

کھرگون، 29 ستمبر (یو این آئی/ایجنسیاں) مدھیہ پردیش کے کھرگون ضلع ہیڈکوارٹر میں آج وزیر اعلیٰ کے قافلے کو کالے جھنڈے دکھانے پر پانچ لوگوں کو حراست میں لے کر جیل بھیج دیا گیا ہے۔سرکاری اطلاعات کے مطابق، آج دوپہر وزیر اعلی شیوراج سنگھ چوہان کا قافلہ ہیلی پیڈ سے کھرگون میں واقع ’کسان اور لاڈلی بہن کانفرنس‘ کے جلسہ گاہ کی طرف جا رہا تھا۔
سڑک کنارے پہلے سے موجود نوجوانوں نے اچانک اپنی جیبوں میں رکھے کالے جھنڈے نکال کر وزیر اعلیٰ کی گاڑی اور قافلے کو دکھانا شروع کر دیے۔ موقع پر موجود پولیس فورس نے اس کے ہاتھوں سے سیاہ جھنڈے چھڑانے کی کوشش کی اور اسے اپنی تحویل میں لے لیا۔ سبھی نوجوانوں کا تعلق کرنی سینا سے بتایا جاتا ہے۔ کھرگون ضلع کانگریس کے صدر روی نائک نے بھی اپنے سوشل میڈیا ہینڈل پر واقعہ کی ویڈیو شیئر کرتے ہوئے کرنی سینا کا ذکر کیا ہے۔ تاہم سرکاری طور پر اس کی تصدیق نہیں ہوسکی ہے۔
امن میں خلل ڈالنے کے الزام میں دفعہ 151 کے تحت حراست میں لیے گئے لوگوں کو کھرگون کے تحصیلدار کے سامنے پیش کیا گیا جہاں سے انہیں عدالتی حراست میں بھیج دیا گیا۔ حکام کا کہنا تھا کہ وہ وزیر اعلیٰ کی حفاظت میں رکاوٹ بن سکتے تھے۔ادھر کرنی سینا نے پکڑے گئےلوگوں کی رہائی کیلئے احتجاج کا سہارا لیتے ہوئے تھانے کا گھراو کیا ہے۔